Байрамға әҙерҙәр!

Башҡортостанда Бөйөк Ватан һуғышында Еңеүҙең 80 йыллығын байрам итеүгә әҙерлек сиктәрендә 1941-1945 йылдарҙағы Бөйөк Ватан һуғышына арналған мемориалдарҙың, һәйкәлдәрҙең һәм обелисктарҙың 99 проценты ремонтланған. БР торлаҡ-коммуналь хужалыҡ министры Ирина Голованова һөйләүенсә, республика биләмәһендә 2381 ошондай объект иҫәпләнә, уларҙан бөгөнгө көнгә 1440 объектта ағымдағы һәм капиталь ремонт башҡарылған, был пландың 99 процентын тәшкил итә. Ҡалтасы районы Түбәнге Ҡашмаш һәм Иглин ауылдарында ике объект буйынса эштәрҙе 6 майҙа тамамлау күҙаллана. Тәүҙә бөтә муниципалитет башлыҡтарынан эштәрҙе 7 майға тиклем тамамлауҙарын һорағайнылар. Башҡортостан Башлығы муниципалитет башлыҡтарына һәйкәлдәрҙе ремонтлау буйынса башҡарылған эштәре өсөн рәхмәт әйтте һәм уны даими алып барырға ҡушты. Ирина Голованова төҙөкләндереү буйынса башҡарылған эштәргә ентекле туҡталды. Мәҫәлән, Өфөлә “Сергиев зыяратының туғандар ҡәберлегендә” туғандар ҡәберендәге хәрефтәрҙе фрезерлау һәм бронзалау, стела пьедесталын ремонтлау, терәк стеналағы гранит плитәләрҙе алмаштырыу буйынса эштәр башҡарылған. Благовещенда Бөйөк Ватан һуғышы йылдарында һәләк булған яугир-благовещендар иҫтәлегенә мемориалда өҫкө йөҙҙәрҙе плитәләр менән көпләү, яңы таяуҙар һәм яҡтыртҡыстар ҡуйыу менән тышҡы яҡтыртыуҙы монтажлау буйынса эштәр эшләнгән. Саҡмағош районының Маҡар ауылында Бөйөк Ватан һуғышында һәләк булған яугирҙәргә яңы һәйкәл ҡуйылды. Иҫке Балтас ауылында “Ҡайғылы әсә” мемориаль комплексы төҙөкләндерелә, стенаны тергеҙеү, гранит менән көпләү, яҙыуҙарҙы тергеҙеү кеүек эштәр башҡарыла. Ауырғазы районы Исмәғил ауылында Бөйөк Ватан һуғышында һәләк булғандарға мемориаль комплекс реконструкцияланған. Стәрлебаш ауылында район Мәҙәниәт йорто алдындағы майҙанда ябай ауыл ҡатын-ҡыҙҙарының ҡаһарманлығына арналған яңы һәйкәл ҡуйылған. Нефтекамала Бөйөк Ватан һуғышы Хәтер аллеяһында мәңгелек ут менән мемориалды төҙөкләндереү, иҫтәлекле плитәләр аҫтындағы тумбаларҙы ремонтлау, мемориаль яҙыуҙарҙы яңыртыу, майҙансыҡты ремонтлау һәм баҫҡыстарҙы гранит менән көпләү буйынса эштәр башҡарылған. Илеш районының ауылдарында Бөйөк Ватан һуғышы яугирҙәренә арналған туғыҙ яңы һәйкәл ҡуйылған. Йыл дауамында объекттарҙы яңыртыу һәм төҙөкләндереү буйынса эш дауам ителәсәк, тип билдәләне Ирина Голованова. Фото: скриншот.