26 апрелдә 40 йәш тулған булыр ине...

26 апрелдә Белорет районының Ҡаһарман ауылы мәктәбендә махсус хәрби операцияла батырҙарса һәләк булған Алмас Ғилман улы Ғизәтуллинға мемориаль таҡтаташ һәм "Герой партаһы" асыу тантанаһы үтте. Сарала Белорет районы хакимиәте башлығы Азат Хәкимов, Белорет мәғариф идаралығы муниципиаль учреждениеһы етәксеһе Эдуард Камалов, Үҙән ауылы хакимиәте башлығы Алексей Севастьянов, “Башҡортостан” гәзитенең бүлек мөдире, Шәһит Хоҙайбирҙин исемендәге премия лауреаты Рәмилә Мусина, Үҙән ауыл советы депутаты Суфиян Ишмөхәматов, Ҡаһарман ауылы старостаһы Сабир Ғиниәтуллин, хеҙмәттәштәре, уҡыусылар, туғандары, класташтары, дуҫтары, ауылдаштары ҡатнашты. Сара мәктәп ихатаһындағы "Батырҙар аллеяһы"на шыршы ағастары ултыртыуҙан башланды. Артабан ошо мәктәпте тамамлаған, шунда эшләп, үҙ теләге менән махсус хәрби операцияға киткән Алмас Ғилман улына таҡтаташты асыу тантанаһы үтте. Таҡтаташты яугирҙең әсәһе Фәниә Кәлимулла ҡыҙы һәм ағаһы Саръян Ғилман улы асты. “Герой партаһы"н асыу хоҡуғы апайҙарына, класташтарына, хеҙмәттәштәренә тапшырылды. Сығыш яһаусыларҙың барыһы ла Алмастың алсаҡ күңелле, ярҙамсыл, һәр эштә лә алдынғы, оҫта ҡуллы булыуын иҫкә алды. Сара һуңында туғандары ауыл мәсетендә батырға арнап ҡорбан ашы ашатты. – Ҡаһарман мәктәбендә гвардия сержанты Алмас Ғилман улы Ғизәтуллинға Герой партаһын һәм мемориаль таҡтаташ асыу тантанаһында ҡатнаштым. Ул былтыр сентябрҙә махсус хәрби операцияла батырҙарса һәләк булған. Ул барлыҡ ғүмеренең төп өлөшөн армияла хеҙмәт итеүгә арнаған. Яҡташыбыҙ барлыҡ ғүмеренең төп өлөшөн армияла хеҙмәт итеүгә арнаған. Хәрби бурысын үтәгәндә күрһәткән ҡыйыулығы һәм фиҙакәрлеге өсөн “Батырлыҡ өсөн”, “Шайморатов”, ”Хәрби батырлыҡтары өсөн” миҙалдары һәм Батырлыҡ ордены менән наградланған. Яугир юлын намыҫлы һәм ғорур үткән. Алмас Ғилман улының ата-әсәһенә, уҡытыусыларына ошондай ысын илһөйәрҙе тәрбиәләгәндәре өсөн ҙур рәхмәт, – тине Белорет районы хакимиәте башлығы Азат Салауат улы Хәкимов. Әйткәндәй, Алмас Ғилман улына таҡтаташ асҡан көндә – 26 апрелдә 40 йәш тулған булыр ине. Эйе, илебеҙ батырҙарын онотмай, Алмас тураһында ла хәтер мәңге һаҡланыр. Ҡаһарман ауылының илһөйәр, батыр йөрәкле улы Алмас Ғилман улы һәм яу яланында һәләк булған барлыҡ яугирҙәр алдында баш эйәбеҙ. Яугирҙең исемен мәңгеләштереүҙә күп көс һалған мәктәп уҡытыусылар коллективына, мәктәп директоры Вадим Ғәффәр улы Моратшинға, мәктәп хеҙмәткәрҙәренә, класташтарына, туғандарына оло рәхмәт. Рәмилә МУСИНА фотолары.