Заман ғалимы ниндәй булырға тейеш?

Башҡортостанда фән өлкәһе идарасылары өсөн “MBA Science” халыҡ-ара стандарт программаһының икенсе этабы башланды. Ул республика етәксеһе Радий Хәбировтың тәҡдиме буйынса тормошҡа ашырыла. Һайлап алыуҙа юғары уҡыу йорттарының – Вуз-ара кампус резиденттарының, урындағы ғилми ойошма һәм предприятиеларҙың 150-нән ашыу вәкиле ҡатнашты. 26-һы тест күнекмәләрен уңышлы үтеп, уҡый башланы. Улар тикшеренеү проекттары аша идара итеү алымдарын, фәнни эшмәкәрлек иҡтисадын, заказсылар менән бәйләнеш үҙенсәлектәрен үҙләштерә. – Заман ғалимы, белемле булыу өҫтөнә, менеджмент алымдарын өйрәнергә тейеш, сөнки бөгөн төп бурыстарҙың береһе – фәнни идеяны коммерциялаштырыу, – ти Башҡортостан ғилми-белем биреү үҙәге идара итеү компанияһының белем биреү программалары етәксеһе Альбина Беляева. “MBA Science-2025” программаһы туғыҙ ай дауам иткән алты тематик модулде үҙ эсенә ала. Уҡыуҙар үткәс, уның йомғаҡтарына ярашлы, сығарылыш белгестәренә проекттарын яҡлау һәм халыҡ-ара стажировка үтеү мөмкинлеге биреү планлаштырыла. Ойоштороусылар әйтеүенсә, белем биреү программаһына ярашлы университеттар менән индустриаль компанияларҙы кооперациялау технология йәһәтенән үҙаллылыҡ ҡаҙаныуға, лидерлыҡҡа йүнәлтелгән яңы перспективалы проекттар булдырыу мөмкинлеген бирәсәк. – “MBA Science” программаһының барлыҡ модулдәре фән өлкәһендә оператив идарасылар десантын әҙерләүгә йүнәлтелгән. Беҙ уны Рәсәйҙең Мәғариф һәм фән министрлығына ла күрһәтеп, хуплау таптыҡ. Хәҙер ошо тәжрибәнән башҡа төбәктәр ҙә файҙаланалыр тип уйлайым, – ти Башҡортостандың ғилми-белем биреү үҙәге идара итеү компанияһы директоры Наталия Латипова. “MBA Science” – Рәсәйҙә фән өлкәһе идарасылары өсөн халыҡ-ара стандарттағы тәүге программа. Уның тәүге өлөшө Башҡортостанда былтыр 8 февралдә тормошҡа ашырыла башланы. Һөҙөмтәлә 20-нән ашыу ғалим, юғары уҡыу йорттары хакимиәттәре, ғилми ойошмалар вәкилдәре проекттарын уңышлы яҡланы һәм Ҡытай Халыҡ Республикаһындағы Гуйлинь ҡалаһы университеттарында, колледждарында стажировка үтте. – Йәш ғалимдар етди асыштар яһай, уларҙы ғәмәли тормошҡа ашырыу юлдарын таба. Беҙ фәндән иҡтисад өсөн һөҙөмтәле ярҙам көтәбеҙ, – тине Вуз-ара кампуста осрашыуҙа республика етәксеһе Радий Хәбиров. – Йәштәр фәнгә, юғары мәктәпкә барһын ине. Ғалимдарға ярҙам күрһәтеүгә ҙур иғтибар бүләбеҙ. Билдәле булыуынса, Рәсәй Президенты Владимир Путиндың ҡушыуы буйынса, илдә заманса кампустар селтәре булдырылды. Әле “Йәштәр һәм балалар” милли проекты ярҙамында ошондай 24 студенттар ҡаласығы төҙөлә. 2036 йылға кампустар иҫәбе ҡырҡҡа етәсәк. Фото Башҡортостан Хөкүмәте сайтынан алынды.