Үз вакытында Экзюпери: «Дөньядагы иң зур байлык – кешеләрнең бер-берсе белән аралашуы» дип язган. Әгәр сезне чәй эчәргә чакыралар икән, димәк, сезне аралашырга, дусларча әңгәмә корырга чакыралар.
Чәй эчү тантанасында Матюшино урта мәктәбе укучылары катнашты. Чараны оештыручы клуб мөдире Асия Фәйзулова хуҗабикә ролендә кунакларны каршы алды. Чәй куагының үскән урыны - Кытай турында сөйләде, чәй сортлары буенча экскурсия уздырды, Англиядә чәй эчү традицияләре белән таныштырды һәм, әлбәттә инде, Рәсәйдә чәй барлыкка килү тарихын искә төшерде.
Укучылар чәй эчүнең традицияләре, чәй эчү атрибутикасы белән таныштылар. Чәй өстәлен дөрес бизәргә өйрәнделәр. Бергәләп чәйнең файдалы үзлекләрен, аны пешерү, чәй турындагы мәкальләрне искә төшерделәр. Мульт-һәм кинофильмнар буенча “Чәй эчү традицияләрен бел" викторинасында катнаштылар.
"Хуш исле чәй" өстәле матур итеп бизәлгән, матур тимер савытларда һәм тартмаларда төрле чәйләр, үләннәр урнаштырылган иде.
«Тәмле, җылы» чара кунаклары бәйрәмчә әзерләнгән өстәл янында бик теләп самавырдан ясалган хуш исле чәйдән, бәлешләрдән авыз иттеләр, бер-берсе белән аралаштылар.
Чарадан балалар бик күп уңай хис-кичерешләр алып таралыштылар.