Өфө ғалимдары йәштәр лидерҙары форумында сығыш яһаны

Рәсәй фәндәр академияһы Өфө федераль тикшеренеү үҙәгенең Биохимия һәм генетика институтының малсылыҡта геном һәм постгеном технологиялары лабораторияһы хеҙмәткәрҙәре студенттарҙың үҙидара форумында ҡатнашты. Бындай сараларҙы үткәреү «Йәштәр һәм балалар» милли проекты (национальный проект «Молодежь и дети») бурыстарына яуап бирә, тип хәбәр иттеләр институтта. Ғалимдар форумда ҡатнашыусыларға 4 апрелдә үҙ эшен башлаған яңы интеллектуаль Геном үҙәгенең эсендә нимәләр булыуын күрһәтте. Үҙәк етәксеһе, биология фәндәре докторы Александра Карунас геном тикшеренеүҙәре өлкәһендә тормошҡа ашырылған төп проекттар тураһында һөйләне. Шулай уҡ ҡатнашыусылар биоинформатика һәм яһалма интеллект ысулдарының ҙур күләмдәге мәғлүмәтте эшкәртеүҙе еңеләйтә алыуын белде. Власть органдары һәм уҡыусы йәштәр араһында диалог төҙөүгә йүнәлтелгән форумда бөтәһе 250 кеше — студсовет етәкселәре, юғары уҡыу йорттарының беренсел профсоюз ойошмалары ағзалары, шулай уҡ академик төркөмдәр старосталары ҡатнашты. Сессияларҙа төрлө өлкәләрҙән эксперттар менән берлектә улар республикала үҙ-үҙеңде тормошҡа ашырыу мөмкинлектәрен һәм патриотик тәрбиә нигеҙҙәрен тикшерҙе. «Йәштәр һәм балалар» милли проекты таланттарҙы үҫтереү һәм йәштәргә үҙҙәрен табыу мөмкинлектәре булдырыуға йүнәлтелгән. Милли проект үҙәгендә – мәктәптәр төҙөү һәм ремонтлау, уҡытыусыларҙың квалификацияһын күтәреү, уҡытыуҙың яңы методикаларын һәм уҡытыу өсөн уңайлы шарттар булдырыу. Милли проект шулай уҡ Донъя кимәлендәге кампустар селтәрен үҫтереүҙе һәм “Өҫтөнлөк 2030” программаһы буйынса юғары уҡыу йорттарына ярҙам итеүҙе күҙ уңында тота. Яңыртылған милли проекттар РФ Президенты Владимир Путиндың ҡарары буйынса 2025 йылдан тормошҡа ашырыла. Фото: ГТРК ТВ