Беҙгә Күгәрсен районында йәшәгән Рауза исемле ҡатындан хат килде. Бәлки уға кәңәш менән ярҙам итеүсе булыр? “Кеше байрамдарҙы көтөп ала, ә мин бөтә йәнем-тәнем менән яратмайым. Сәбәбе – ирем. Ул һис тә алкаш түгел, эшсән, тырыш кеше. Тик бына байрамдар етһә, эсә лә ҡайта... Ә иң йәнде көйҙөргәне уны башҡалар эсерә – туғандары, хеҙмәттәштәре, күршеләр. Ғаиләбеҙ матур беҙҙең, етеш йәшәйбеҙ. Ирем егәрле, ҡулы ла алтын. Миңә һәм балаларға ҡарата һәйбәт мөнәсәбәттә. Тик холҡо йомшағыраҡ. Былай көндәрҙә, сәбәпһеҙ бер ҡасан да эсмәй. Тик бына байрамдар етһенме, эсә лә ҡайта. Шунда уҡ холҡо үҙгәрә, һөйләнә башлай, әллә ниндәй үпкәләрен иҫенә төшөрә, балаларға юҡ-барға бәйләнә, һүҙ әйтһәң, ҡул күтәрә. Аҫтын бысратып, хайуан хәленә ингәне лә булғылай... Байрам нисә көн дауам итә, шунса көн айнымай. Айыҡһа, аяғыма йығылып ғәфү үтенә, башҡаса ҡабатланмай ти... “Китәм” тип ҡурҡытып ҡарағаным да бар, тик башҡа яҡтан һәйбәт булғас, тағы аптырайым. “Кодировать” итәм тиһәм, мин алкаш түгел ти, бармай.