Иң шәп фельдшерҙар ҡайҙа эшләй?

Тормошобоҙҙо медицина хеҙмәткәрҙәренән тыш күҙ алдына килтереүе ауыр. Был һөнәр эйәләре араһында фельдшерҙар айырым урын биләй. Тап ошо медицина хеҙмәткәрҙәре “Ашығыс медицина ярҙамы” машинаһында, фельдшер-акушерлыҡ пункттарында бәләгә тарығандарҙы, медицина ярҙамына мохтаждарҙы ҡабул итә. Фельдшер – ул һөнәр генә түгел, хатта йәшәү рәүеше, тиһәк, һис хата булмаҫ, сөнки тынғыһыҙ эште үҙ итә алғандар ғына был йүнәлеш буйынса эшләй алалыр. Әйткәндәй, бөгөн баш ҡалабыҙҙа “Башҡортостан Республикаһы фельдшер-акушерлыҡ пункттарының иң яҡшы фельдшеры” республика һөнәри конкурсының икенсе этабы үткәрелде: 26 фельдшер үҙ көсөн һынаны. Күмертау ҡала дауаханаһы, Дүртөйлө үҙәк район дауаханаһы, Стәрлетамаҡтағы 1-се ҡала клиник дауаханаһы, Балаҡатай үҙәк район дауаханаһы, Үрге Йәркәй үҙәк район дауаханаһы, Өфөләге 9-сы ҡала клиник дауаханаһы, Ҡариҙел үҙәк район дауаханаһы, Белорет үҙәк район клиник дауаханаһы, Ҡырмыҫҡалы үҙәк район дауаханаһы, Йәрмәкәй үҙәк район дауаханаһы фельдшерҙары Өфөгә килде. Сара Башҡортостан Һаулыҡ һаҡлау министрлығының Квалификация камиллаштырыу үҙәгендә үткәрелде. Башҡортостандың Һаулыҡ һаҡлау министрлығының матбуғат хеҙмәте хәбәр итеүенсә, конкурстың беренсе этабында – арауыҡта тест үткәреүҙә – 61 медицина ойошмаһынан 1380 конкурсант ҡатнашҡан. Конкурста ҡатнашыусылар юғари һөнәри оҫталығын күрһәтте. Улар көндәлек эштәрендә атҡарған манипуляцияларҙы – заданиеларҙы – атҡарҙы. Бәйге еңеүсеһеҙ булмай. Беренсе урынға Йәрмәкәй үҙәк район дауаханаһынан фельдшер Гөлнара Кашапова лайыҡ булды. Икенсе урынға Үрге Йәркәй үҙәк район дауаханаһы фельдшеры Гөлназ Гәрәева сыҡты. Өсөнсө урын Ҡариҙел үҙәк район дауаханаһынан фельдшер Лида Игошеваға бирелде. Дүртенсе урында - Стәрлетамаҡтағы 1-се ҡала клиник дауаханаһы фельдшеры Эльвира Шәфиева, бишенселә - Ҡариҙел үҙәк район дауаханаһынан Нурия Йосопова. Еңеүселәрҙең барыһын да ҡотлайбыҙ һәм еңел булмаған эштәрендә уңыштар теләйбеҙ!