Кыргыз Республикасынын Министрлер кабинетинин төрагасы Адылбек Касымалиев АКШга болгон иш сапарынын алкагында ири америкалык корпорациялар менен эки тараптуу жолугушууларды өткөрүп, авиация, IT, интернет, инвестиция жана энергетика тармактарындагы кызматташтыкты талкуулады.
🇰🇬 Кыргызстандын президентинин администрациясынын жетекчиси Адылбек Касымалиев АКШга болгон иш сапарынын алкагында экономиканын ар кайсы секторлорунан ири америкалык корпорациялардын жетекчилери менен бир катар эки тараптуу жолугушууларды өткөрдү.
✈️ «Boeing» компаниясынын аймактык директору Павел Чичко менен авиация тармагындагы кызматташууну кеңейтүү, Кыргызстандын авиациялык инфраструктурасын модернизациялоо жана транзиттик потенциалды өнүктүрүү боюнча мүмкүнчүлүктөр талкууланды.
💻 «IBM» компаниясынын мамлекеттик башкаруу жана жөнгө салуу боюнча вице-президенти Майк Харни менен мамлекеттик органдардын ишинин натыйжалуулугун жогорулатуу, процесстерди оптималдаштыруу жана Кыргызстандын экономикасын санариптештирүүнү тездетүү боюнча IBMдин алдыңкы IT-чечимдерин жана технологияларын киргизүү боюнча конкреттүү кадамдар талкууланды. Киберкоопсуздук жана жеке маалыматтарды коргоо маселелерине өзгөчө көңүл бурулду.
📡 «Starlink» компаниясынын директору Ребекка Хантер менен Кыргызстандын бардык аймагында, анын ичинде тоолуу жана алыскы райондордо жогорку ылдамдыктагы интернетке кеңири жеткиликтүүлүктү камсыз кылуу үчүн Starlinkтин алдыңкы спутник технологияларын колдонуу боюнча практикалык аспектилер каралды.
⚖️ «White & Case LLP» юридикалык фирмасынын өнөктөшү Мэтью Дроссос менен Кыргызстандагы инвестициялык долбоорлорду укуктук коштоо, инвесторлордун укуктарын коргоо чөйрөсүндөгү мыйзамдарды өркүндөтүү жана инвестициялык климатты жакшыртуу боюнча маселелер талкууланды.
⛏️ «SinoPowell» компаниясынын аткаруучу директору жана негиздөөчүсү Стивен Пауэлл менен пайдалуу кендерди казып алуу тармагындагы инвестицияларды тартуу мүмкүнчүлүктөрү, айрыкча маанилүү минералдык кендерди иштетүү боюнча талкуу болду.
🔋 «Cove Capital» компаниясынын башкаруучу өнөктөшү Пини Алтаус менен энергетикалык секторго жана маанилүү минералдарды казып алуу жана кайра иштетүү менен байланышкан долбоорлорго инвестициялоо келечеги талкууланды.
🤝 Бардык жолугушууларда Адылбек Касымалиев Кыргыз Республикасынын өкмөтүнүн инвестициялык климатты жакшыртууга, инвесторлордун укуктарын коргоого жана ишке ашырылып жаткан долбоорлорго ар тараптуу колдоо көрсөтүүгө бекем берилгендигин баса белгиледи. Кыргызстан экономикасын туруктуу өнүктүрүү, жарандардын жашоо деңгээлин жогорулатуу жана инновациялык долбоорлорду ишке ашыруу үчүн алдыңкы технологияларды, билимдерди жана капиталды тартууга кызыкдар экенин да билдирди.
🏦 Иш сапарынын аягында Адылбек Касымалиев «VISA» компаниясынын процессинг борборунун ишмердүүлүгү менен таанышып, каржылык операциялар чөйрөсүндөгү алдыңкы тажрыйба жана технологиялар менен таанышты.