Владимир Ильичты онотманығыҙмы? Бөгөн уның тыуған көнө

Владимир Ильич Ленин илебеҙ тормошон ҡырҡа үҙгәрткән кеше. Ул теүәл 155 йыл элек – 1870 йылдың 22 апрелендә Сембер ҡалаһында (хәҙерге Ульяновск) тыуған. 1924 йылда ул вафат була. Гениаль фекерсе һәм төҙөүсе, беренсе социалистик дәүләткә нигеҙ һалыусы Ленин тарихи процестың бөтә барышына ҙур йоғонто яһай. Уның тормош юлы хеҙмәт кешеләренең мәнфәғәттәренә фиҙаҡәр хеҙмәт итеү, тигеҙлек, туғанлыҡ һәм халыҡтар дуҫлығы идеяларын тантана итеү өсөн көрәш өлгөһө булып тора. Ленин һәм большевиктар революцион хәрәкәттең үҫеш юлын тәҡдим итә. Ул фәнни, диалектик ҡарашҡа нигеҙләнгән марксистик теорияның һәм революцион практиканың берҙәмлегенән ғибәрәт була. Был юлдың дөрөҫлөгөн тормош иҫбатлай. “Беҙҙең ҡараштар өсөн тарих үҙе, һәр аҙымда ысынбарлыҡ сығыш яһай”, - тип яҙа В.И. Ленин Беренсе рус революцияһы ваҡытында, 1905 йылдың ноябрендә. В.И. Ленин тере саҡта уҡ уның образы сәнғәттә, матбуғатта, публицистикала, халыҡ тамашаларында формалаша башлай. Был процеста Владимир Ильичтың йоғонтоһо ҙур була. 1924 йылдан һуң юлбашсы образы дәүләт эше булып китә һәм киләсәк быуын уның идеяларын үҫтереүҙе, дауам итеүҙе төп девиз итеп ала. – Компьютерҙар һәм смартфондар, заманса элемтә технологиялары быуаттарында түгел, ә листовкалар һәм инаныу көсө ярҙамында донъяның иң ҙур илендә революция булдыра алған кешенең тыуған көнө. Уның ышандырыу һәләте, ораторлыҡ һәм ойоштороу һәләте өсөн, күптәр, ерҙәге халыҡтың күпселеге, уны донъялағы иң гениаль кеше, тип иҫәпләй. – ти В.И. Лениндың Йорт-музейы директоры Хәлил Хәмзин. Шулай уҡ бөгөн музейҙа Владимир Лениндың тыуған көнөнә арнап, “Тыуған илемдә Ленинға һәйкәл” флешмобын ойошторалар. Уның шарттарына ярашлы, ҡатнашыусылар үҙҙәренең ҡалаһындағы йәки ауылындағы Владимир Ильич Ленин һәйкәле, бюсы фотоһын музейҙың социаль селтәрҙәге сәхифәһенә пост итеп ҡуя ала. Уның һыны эргәһендә төшкән фотоғыҙҙы ла урынлаштыра алаһығыҙ. Әйткәндәй, 17 апрелдә В.И. Лениндың Йорт-музейында Өфө ҡала хакимиәте башлығы Ратмир Мәүлиев булды. Ратмир Рафил улы музей экспозицияһы менән танышты, 1941-1945 йылдарҙағы Бөйөк Ватан һуғышында Еңеүҙең 80 йыллығы сиктәрендә буласаҡ саралар менән ҡыҙыҡһынды. Ҡала башлығы шулай уҡ бинаның дөйөм торошона һәм музей биләмәһен төҙөкләндереүгә иғтибар итте. Йорт-музей директоры Хәлил Хәмзин Ратмир Рафаил улына музейҙа ойошторолған күргәҙмәләр, шул иҫәптән В.И. Лениндың 155 йыллығына арналған күргәҙмәләр тураһында һөйләне. 5 майҙа музей биләмәһендә мәктәп уҡыусыларын, көмөш йәштәге кешеләрҙе һәм Өфө халҡын йәлеп итеп үткәреләсәк “Катюша” патриотик акцияһы ойошторасағы тураһында һөйләне. Тарихын белгән, хөрмәт иткән илдең генә киләсәге бар. Тимәк, В.И. Ленинды ла беҙ һәм киләсәк быуын онотмаясаҡ. Фотолар сығанағы: vk.com/id562240022?from=search