12 майҙан Өфөнөң Ленин исемендәге паркы реконструкцияға ябыла

Был хаҡта бөгөн Башҡортостан Башлығы Радий Хәбиров аҙналыҡ оператив кәңәшмәлә хәбәр итте. – Беҙ Өфөлә ҙур күләмдә эш башҡарҙыҡ, Черниковка, Дим, Сипайлово, Затон, Инорс биҫтәләрендәге ҙур парктарҙы тәртипкә килтерҙек. Хәҙер Ленин исемендәге паркта – Өфө халҡының яратҡан ял итеү урындарының береһендә тәртип урынлаштырырға ваҡыт етте, – тине Радий Хәбиров. – 12 майҙан парк тулыһынса ябыла. Унда коммуникацияларҙы асырға һәм күсерергә кәрәк, шуға күрә территорияға инеүҙе өлөшләтә сикләү мөмкин түгел. Халыҡтан быны аңлауын һәм йәйәү йөрөү маршруттарын үҙгәртеүҙәрен һорайым. Барыһын да тиҙ арала эшләргә тырышасаҡбыҙ, әммә эштәрҙе кәмендә ике йыл дауам итербеҙ, тип уйлайым. Парк төбәк әһәмиәтендәге мәҙәни мираҫ объекты булғанлыҡтан, уның бөтә төп элементтары һәм объекттары һаҡланасаҡ. – Был парк халҡыбыҙ өсөн бик ҡәҙерле, һәм улар уның үҙгәрештәренә һиҙгер ҡарай. Унда һәйкәлдәр, мемориаль объекттар күп. Унда булған бөтә нәмәне һаҡлап ҡаласаҡбыҙ, – тине Радий Хәбиров. - Территорияны тәртипкә килтерербеҙ, уға яңы һулыш өрөр, инженер системаларын, юлдарҙы яңыртырбыҙ һәм, иң элек, ярым емерелгән фонтандарҙы реконструкциялайбыҙ. Паркты “Тормош өсөн инфраструктура” милли проектының “Уңайлы ҡала мөхитен булдырыу” программаһы сиктәрендә төҙөкләндерәсәктәр. – Был эштәр өсөн беҙ федераль финанслауҙы һәм “Һаҡлыҡ банкы” средстволарын йәлеп итә алдыҡ. Проектты Герман Оскарович Греф менән шәхсән тикшерҙек, һәм мин уға ярҙам күрһәткәне өсөн рәхмәтлемен, – тип билдәләне Радий Хәбиров. Башҡортостан Башлығы шулай уҡ йәмәғәт контроль эшсе төркөмөн ойошторорға ҡушты. – Уға территорияға инеп, төҙөлөш-монтаж эштәре барышын контролдә тота алған активистар һәм эксперттар инәсәк. Был мөһим, сөнки кешеләрҙе төҙөкләндереүҙең нисек барыуы борсой, – тине Радий Хәбиров. – Был йәмәғәт контролендә ҡатнашыусыларҙың береһе мин үҙем буласаҡмын. Минең эштән паркка тиклем алыҫ түгел. Фото: Башҡортостан Башлығы сайты.