Ҡомартҡылар ҡалдырайым тип тырыша

Бөгөн республикабыҙ Милли кейем көнөн билдәләй. Байрам Башҡортостан Республикаһы Башлығы Радий Хәбиров ҡарары буйынса 2020 йылдан алып йылына ике тапҡыр – апрелдең өсөнсө һәм сентябрҙең икенсе йомаһында билдәләнә. Республикабыҙҙың күп милләтле халҡы өсөн был көн көтөп алынған ҡыуаныслы сараға әйләнә. Халыҡтың ҡабатланмаҫ үҙенсәлектәрен, мәҙәниәтен, тарихын, донъяға ҡарашын уның борондан килгән, традицион кейем өлгөләренә ҡарап аңларға була, ти белгестәр. Ҡыуанысҡа күрә, Башҡортостаныбыҙҙа милли кейемгә иғтибар йылдан-йыл арта, уға арналған конкурстар үткәрелә, халыҡтың боронғонан килгән үҙенсәлекле кейемен өйрәнеүсе, уны тергеҙеүсе оҫталар ҙа арта. Әбйәлил районының Яңауыл ауылында йәшәүсе Гәүзәрә Мөхәмәтйәрова өләсәһе Мәфтүхә Абдулғәни ҡыҙының ҡәҙерләп тотҡан милли кейемдәрен күреп, һоҡланып үҫкән. Ҡул эштәренә оҫта өләсәһенән тегеү нескәлектәренә лә өйрәнгән. Икенсе өләсәһе Камила Әҙелгәрәй ҡыҙы ла был йәһәттән маһир була, ейәнсәренә белгәндәрен өйрәтергә, күрһәтергә тырыша. Гәүзәрә апайҙың был шөғөлө ғаиләһе өсөн дә ифрат файҙа ҡыла: 90-сы йылдарҙа ул яҡындарына өҫ кейемдәрен үҙе тегә. Ә хаҡлы ялға сыҡҡас, күптәнге хыялын тормошҡа ашыра башлай: башҡорт милли кейеме өлгөләрен өйрәнеп, уларҙы тегергә тотона. Республикала билдәле оҫталарҙан һабаҡтар ала, оҫталыҡ дәрестәрендә ҡатнаша, үҙен камиллаштыра, һәләтен һынап ҡарай. Ошо шөғөлөнә бағышлаған ике йыл ярым ваҡытта Гәүзәрә апайҙың ярайһы кейем өлгөләре, ҡатын-ҡыҙ биҙәүестәре тупланған. Балалар кейеме өлгөләре менән ул “Таҡыя” республика конкурсында көсөн һынай, унан инде уҙған йылда “Тамға”ла ҡатнашырға йөрьәт итә. Конкурста Гәүзәрә Мөхәмәтйәрова “Башҡорт традицион кейеме аксессуарҙары – реконструкция” номинацияһында өсөнсө урынға лайыҡ була. Беренсе тапҡыр ҡатнашҡан ҡул оҫтаһы өсөн был, әлбиттә, ҙур уңыш. Ул артабанғы эштәргә илһамландыра, яуаплылыҡ та өҫтәй. – Буш ваҡытымда тиҙерәк яратҡан шөғөлөмә тотона һалам. Яҡындарыма рәхмәт, минең мауығыма хөрмәт менән ҡарайҙар, ярҙам итәләр, – тип ҡыуана Гәүзәрә апай. – Киленем Ләйсәнде лә өйрәтәм, ул әле беренсе күлдәген тегеп ҡараны (һүрәттә), артабан башҡа өлгөләрҙе эшләп ҡарарға уйы бар. Ейәндәрем дә ихлас ҡыҙыҡһына, ҙур еләк менән милли кейемде кейәләр, шулай фотоға төшөргә лә яраталар. Әйткәндәй, мәҡәләне биҙәгән фотоһүрәттә Гәүзәрә апайҙың килене Ләйсән һәм ейәндәре Арина, Эльза һәм Искәндәрҙе күрергә мөмкин. Милли кейемде, биҙәүестәрҙе тарихи өлгө буйынса тергеҙеп эшләгәндә, Гәүзәрә апай һәр саҡ республикала танылған милли кейем оҫталарына мөрәжәғәт итә, уларҙың бар кәңәшен тотоп эшләй. “Өйрәнәһе нәмәләр күп әле”, – ти ул. Кәңәштәре, ярҙамдары өсөн оҫталарға сикһеҙ рәхмәт әйтә. Бәхеткә күрә, хәҙерге интернет заманында улар менән бәйләнеш тотоу ҙа күпкә еңел: милли кейемгә булған ҡыҙыҡһыныу, һөйөү тотош республикала, унан ситтә йәшәгән кәсепселәрҙе уртаҡ төркөмдәргә берләштерә, уларҙағы йәнле фекер алышыу, кәңәшләшеү бер ҡасан да туҡтамай. Яҙмабыҙ геройы булған оҫтабикә үҙе өйрәнеп кенә ҡалмай, белгәндәрен милли кейем тегергә өйрәнергә теләүселәр менән дә уртаҡлаша, һәр аҙна һайын бер төркөм ҡатын-ҡыҙға оҫталыҡ һабаҡтары үткәрә. – Әле бына маңлайса тегә башланым. Борон халҡыбыҙҙа кейәүгә сыҡмаған йәш ҡыҙҙар баштарына тап уны кейгән. Маңлайсаны эшләгәндә, мөмкин тиклем тарихи дөрөҫ өлгөгә тап килһен өсөн, боронғо тәңкәләрҙе ҡулланам. Балаларға ҡомартҡы итеп ҡалдырырлыҡ та булһын, – ти ул.