Үҫмерҙәрҙе был яңылышыуҙан һаҡлағыҙ!

Халыҡ араһында аңлатыу эштәре әүҙемләшеүгә ҡарамаҫтан, телефон аша алдашып аҡса урлау осраҡтары арта бара. Башҡортостандың Йәмәғәтселек палатаһы “Кибералдашыу профилактикаһы: интернет-алдашыу, һанлы алдашыу. Үҫмерҙәргә һәм йәштәргә ҡарата енәйәттәр” исемле өйрәтеү конференцияһы үткәрҙе. Сарала Йәмәғәтселек палатаһы рәйесе урынбаҫары, “Сеньор” ололарға ярҙам итеү һәм хәстәрләү фонды президенты Кристина Недорезова, Рәсәй Федерацияһы Үҙәк банкы Урал Баш идаралығының Башҡортостан Республикаһы буйынса Милли банкының хәүефһеҙлек бүлеге эксперты Ольга Кузнецова, Республика йәштәр социаль-психологик һәм мәғлүмәт-методика үҙәге етәксеһе Искәндәр Мостафин, Башҡортостан Республикаһы буйынса Эске эштәр министрлығының Мәғлүмәт-коммуникация технологияларын ҡануниәтте боҙоп файҙаланыуға ҡаршы көрәш буйынса идаралығы етәксеһе урынбаҫары, полиция полковнигы Азат Тимерйәнов ҡатнашты һәм сығыш яһаны. “Халыҡ араһында төрлө сығанаҡтар аша аңлатыу эштәре алып барыу, киң мәғлүмәт саралары аша сығыш яһау, лекциялар үткәреү эше әүҙемләшеүгә ҡарамаҫтан, телефон аша алдашып аҡса урлау осраҡтары арта бара”, – тине Кристина Недорезова. “Айырыуса үҫмерҙәрҙе алдаҡ тоҙағына эләктереү һәм уларҙан аҡса күсертеү осраҡтарының йышайыуы ҙур борсолоу тыуҙыра”, – ти Искәндәр Мостафин. – “Йәш быуын интернетта күп ваҡытын үткәрә һәм енәйәтселәр шунан файҙаланырға тырыша ла инде. Хәҙер дропперҙар – бер кешенән икенсеһенә аҡса тапшырыу буйынса курьерҙар күбәйә башланы. Енәйәтселәр уларҙы, йәнәһе ҡәҙимге курьерҙар хеҙмәтенә эшкә ала һәм хеҙмәт хаҡы вәғәҙә итә. Ҡулына аҙмы-күпе аҡса алғас, үҫмерҙәр енәйәтселеккә ылығып киткәндәрен һиҙмәй ҙә ҡала. Артабан ул йәш-елкенсәкте дроппер булыуҙан нисек ҡотҡарыу буйынса психолог кәңәштәре тураһында видеолекция күрһәтте. “Банктарға үҙ клиенттарына телефондан шылтыратыу тыйылды, шуға күрә үҙен банк тип атаған әҙәмдәргә яуап бирмәгеҙ”, – тине Ольга Кузнецова. Азат Тимерйәнов ошо енәйәтселек өлкәһендә үҫмерҙәрҙе алдау буйынса байтаҡ миҫалдар килтерҙе һәм бынан һаҡланыу саралары тураһында һөйләне. Автор фотоһы.