Ғүмере өсөн ярты миллион һум аҡса талап иткәндәр...

Өфөлә көс хеҙмәткәрҙәре Мысырҙан килгән студентты ҡотҡарған. Хәл былай була: Стәрлетамаҡта уҡыған студентты билдәһеҙ дүрт кеше урлап, Өфөгә алып килә. Уның ғүмере өсөн енәйәтселәр ярты миллион һум аҡса талап итә. Был хәл тураһында Тәфтиш комитетында һәм Эске эштәр министрлығында хәбәр иттеләр. Ведомство мәғлүмәттәре буйынса, сит ил студентына 15 апрелдә һөжүм итәләр: уның фатирына билдәһеҙ кешеләр килеп инеп, бысаҡ һәм пистолет менән ҡурҡыта башлай. Уғрылар ирҙе Өфөгә алып китеп, Маяковский урамында урынлашалар. Зыян күреүсенең ҡатыны шунда уҡ полицияға мөрәжәғәт итә. Көс хеҙмәткәрҙәре ғәйепләнеүселәрҙең эҙенә төшә һәм сит ил студентын йәшергән фатирҙа уҡ енәйәтселәрҙе тотоп ала. Улар янында бысаҡ һәм пневматик пистолет табыла.Эске эштәр министрлығы һәм Тәфтиш комитеты мәғлүмәттәре буйынса, урлауҙың яҡынса сәбәбе – зыян күреүсенең бурысы. “Ул бер ғәйепләнеүсегә эш өсөн үҙенең машинаһын биреп тора, әммә ул машинаға зыян килтерә һәм һөҙөмтәлә уны сифатһыҙ ремонтлай. Һуңғараҡ зыян күреүсе был кешенән аҡса ала, тик бер өлөшөн генә кире ҡайтара һәм бурыслы ҡала. Автомобилде сифатһыҙ ремонтлауға һылтанып, ҡалған сумманы түләүҙән баш тартҡас, ғәйепләнеүсе көтмәгәндә бурыс суммаһын 500 мең һумға тиклем арттыра”, – тип хәбәр итә полиция. Әлегә осраҡ буйынса енәйәт эше ҡуҙғатылған, тикшереү эштәре бара. Әгәр ҙә ҡулға алыныусыларҙың ғәйебе иҫбатланһа, уларға 5-12 йыл төрмә янай. Фото: Республика буйынса Эске эштәр министрлығы.