Президент Садыр Жапаров Кыргыз Республикасынын Улуттук банкына санарип сомду чыгарууга жана анын айлануусун жөнгө салууга укук берүүчү конституциялык мыйзамга кол койду.
🇰🇬 Кыргыз Республикасынын Президенти Садыр Жапаров Кыргыз Республикасынын Улуттук банкы тууралуу конституциялык мыйзамга өзгөртүүлөрдү киргизүү жөнүндө мыйзамга кол койду.
🔑 Жогорку Кеңеш тарабынан 2025-жылдын 20-мартында кабыл алынган бул конституциялык мыйзамдын максаты – улуттук санариптик валюта «санарип сомдун» прототипинин пилоттук долбоорун ишке киргизүү жана анын укуктук базасын түзүү.
💡 Конституциялык мыйзамга ылайык, Кыргыз Республикасынын Улуттук банкы санарип сомду эмиссиялоо, анын чыгарылышы жана жүгүртүлүшү боюнча өзгөчө укукка ээ.
🖥️ Санарип сом Кыргыз Республикасынын аймагында мыйзамдуу төлөм каражаты болуп саналат жана атайын платформада санариптик формада жүгүртүүгө чыгарылат.
🏦 Санарип сом платформасынын оператору Улуттук банк болуп саналат жана ал санарип сомду эмиссиялоо, эсепке алуу жана жайылтуу үчүн технологиялык жана программалык инфраструктураны камсыздайт.
🔒 Улуттук банк санарип сомдун коопсуздугун камсыздоо жана алдамчылык операциялардын алдын алуу үчүн криптографиялык коргоо белгилерин аныктайт.
📜 Санарип сом платформасынын иштешине байланыштуу Улуттук банк башка функцияларды жана ыйгарым укуктарды Кыргыз Республикасынын төлөм системасы жөнүндө мыйзамдарына ылайык ишке ашырат.