Илһөйәрлек рухында тәрбиәләргә булышлыҡ итә

16 ноябрҙә Өфөлә Рәсәй Геройҙары иҫтәлегенә арналған самбо буйынса “Zвезда” Бөтә Рәсәй турниры асылды. Сара “Рәсәй Zа Самбо” форумы сиктәрендә бара. Тантаналы сарала “Берҙәм Рәсәй” партияһы Генераль советы Серетары вазифаһын ваҡытлыса башҡарыусы, Федерация Советы Рәйесенең беренсе урынбаҫары Владимир Якушев, Башҡортостан Башлығы Радий Хәбиров, Алтай Республикаһы Башлығы, төбәк Хөкүмәте рәйесе Андрей Турчак, Донецк Халыҡ Республикаһы Башлығы Денис Пушилин һәм Бөтә Рәсәй самбо федерацияһы президенты Сергей Елисеев ҡатнашты. Сара башланыр алдынан маҡтаулы ҡунаҡтар, ярыштарҙа ҡатнашыусылар һәм башҡалар Рәсәй Геройҙарын бер минутҡа тын ҡалып хәтергә алды. Владимир Якушев үҙ сығышында турнирҙың 1800 спортсыны йыйыуы турыһында һөйләне. - Самбо – үҫеп килгән быуын вәкилдәрен илһөйәрлек рухында тәрбиәләргә булышлыҡ итә. Барлыҡ ҡатнашыусыларға уңыштар теләйем, - тине Владимир Якушев. - Башҡортостан Хөкүмәтенә ярыштарҙы яҡшы ойошторғаны өсөн рәхмәт. Был спорт ҡорамынан ныҡлы сыныҡҡан күп кенә малайҙар һәм ҡыҙҙар сығыр тип ышанам. Башҡортостан Башлығы Бөтә Рәсәй самбо федерацияһына был спорт төрөнөң республикала үҫешенә етди иғтибар бүлеүе өсөн рәхмәт әйтте. - Самбо буйынса Бөтә Рәсәй турниры – Көрәш һарайында үткәрелгән беренсе масштаблы ярыштар. Самбо – кешеләрҙе тәрбиәләгән һәм уларҙы ҙур илдең граждандары иткән милли спорт төрөбөҙ. Бөгөн бындағы махсус хәрби операцияла ҡатнашыусыларҙы айырыуса сәләмләге килә, - тине Радий Хәбиров. – Көрәш һарайына малайҙарҙың килеүе ҡыуаныслы. Уларға спорт менән шөғөлләнегеҙ, ул холоҡто һәм тәнде сыныҡтыра. Һеҙ – илебеҙ киләсәге, ә Рәсәйгә көслө, ныҡлы, ысын илһөйәрҙәр кәрәк. Спортсыларға иһә яңы еңеүҙәр теләйем. Ғәҙел алышта көслө еңһен. Турнир асылғас, Андрей Турчак та ҡотлау һүҙҙәрен еткерҙе. Денис Пушилин Башҡортостан етәкселегенә турнирға саҡырғандары өсөн рәхмәт әйтте һәм спортсыларға матур, ғәҙел көрәш теләне. Турнирҙы асыу тантанаһынан һуң маҡтаулы ҡунаҡтар Көрәш һарайын ҡараны. Бында төбәктең физкультура һәм спорт, йәштәрҙә илһөйәрлек тәрбиәләү өлкәһе ҡаҙаныштарынан экспозиция бар ине. Шулай уҡ тренажерҙар залын, бәләкәй аренаны, конференциялар залын, спортсылар өсөн ҡунаҡхананы күрһәттеләр. Бынан тыш, Көрәш һарайында медицина-тергеҙеү үҙәге һәм спа-комплекс бар. Сығанаҡ, фото: glavarb.ru/rus/press_serv/novosti/185694.html