Ейәнсура районында “Атайсал. Яҡташлыҡ көсө” муниципаль-ара форумы уҙҙы

Сарала Көйөргәҙе, Күгәрсен, Йылайыр, Мәләүез, Хәйбулла һәм Күмертау ҡалаһынан, Ырымбур өлкәһенән делегациялар ҡатнашты. 2021 йылда Башҡортостан Башлығы Радий Хәбировтың тәҡдиме һәм шәхси өлгөһө менән башланған “Атайсал” проектын республика халҡы дәррәү күтәрмәләп ҡаршы алды, һәм ул һәр кемдең изге бурысына әйләнде. Ейәнсуралар форумға ихлас әҙерләнгән. Был проектҡа тыуған төбәгендә көн күреүселәр генә түгел, ситтә йәшәп, йөрәк түрендә, күңелдәрендә тыуған яҡҡа һөйөү йөрөткән ейәнсуралар ҙа кесе Ватаныны тағы ла гүзәлерәк, уңайлыраҡ итеү акцияһына ҡушылған. Район мәҙәниәт һарайы фойеһында бай күргәҙмәлә ҡунаҡтар урындағы эшҡыуарҙарының бренд булырлыҡ продукциялары менән танышты. Махсус хәрби операцияға, госпиталь өсөн ирекмәндәрҙең теккән кейемдәре, етештергән аҙыҡ-түлек, яугирҙәр өсөн әҙерләнгән маскировка селтәре өлгөләре менән танышты. Форум программаһы сиктәрендә һигеҙ секция эшләне. Сараның йомғаҡлау өлөшөндә мәртәбәле ҡунаҡтар: Дәүләт Думаһы депутаты Зариф Байғусҡаров, Башҡортостан Республикаһы Премьер-министрының беренсе урынбаҫары вазифаһын башҡарыусы Урал Килсенбаев изгелек, илһөйәрлек, мәрхәмәтлелек акцияһында әүҙем ҡатнашҡан бер төркөм уңғандарға Маҡтау грамоталары тапшырҙы. “Юлдаш” радиоһында “Теге өсәү” тапшырыуын алып барыусы Йәмил Ишмөхәмәтов менән шағир, журналист, әҙәби критик Азамат Юлдашбаевтың сараны йәнле, ихлас итеп алып барыуы, шулай уҡ популяр этно-йырсы Зәйнетдиндең, урындағы мәҙәниәт хеҙмәткәрҙәренең сығыштары йәм өҫтәне.