Алты балаһы – алты бәхете

“Башҡортостан” гәзитенең “Бәйләнештә” төркөмөндә Халыҡ-ара әсә көнөнә арналған конкурста ҡатнашҡан Хәйбулла районының Мәмбәт ауылында йәшәгән күп балалы әсә Лира Рәсүл ҡыҙы Мәмбәтова, яҙмыш һынауҙарына бирешмәй, алты балаһын үҙе аяҡҡа баҫтырырға, уларҙы тормош ауырлыҡтарынан ҡурсып, матур йәшәргә тырыша. Ейәнсура ҡыҙы бәрәкәтле Хәйбулла еренә килен булып төшкән. Ҡыҙғанысҡа ҡаршы, ҡайғы ағас башынан түгел, әҙәм башынан йөрөй шул: биш йыл элек ире яҡты донъя менән хушлашҡан. Күп балалы әсәнең төп ҡыуаныс-шатлығы - ғәзиз ҡыҙҙары һәм улдары. Улар иһә донъялағы иң яҡын, матур кешеләренең йөҙөнә ҡыҙыллыҡ килтермәҫкә тырыша: яҡшы уҡый, төрлө сараларҙа әүҙем ҡатнаша. Лира Рәсүл ҡыҙы үҙе лә сәнғәткә ғашиҡ кеше, бейей, әүҙем, төрлө сараларҙа ҡатнаша. Әсәнең иң ҙур улы Ильяс - ныҡлы терәк-таянысы. Ҡыҙы Илүзә лә һәр йәһәттән ярҙамсы. Икеһе лә әүҙем, төрлө сараларҙа, олимпиадаларҙа ҡатнашалар. Илһам иһә компьютер, робот техникаһы менән ҡыҙыҡһына. Унан ҡала Исламға – 11 йәш, яҡшы уҡырға тырыша. Бишенсеһе Айзилә төрлө сараларҙа ҡатнаша, урындар ала, һүрәт төшөрә. Кинйә малай Инсаф – II класс уҡыусыһы, уҡыуға шәп, бигерәк тә математиканы үҙ итә. Лира Рәсүл ҡыҙы ҡыҙҙары һәм улдары менән сәйәхәт итергә, төрлө ҡалаларҙы күрергә, диңгеҙгә, музейҙарға барырға тырыша. Мәҫәлән, Санкт-Петербургтағы иҫтәлекле урындарҙы ҡарағандар. Сочиға ла барғандар. “Тыныс ҡына мөхиттә тәрбиәләргә тырышам балаларымды. Мәктәптә иһә ата-әсәләр комитеты рәйесемен, - тип һөйләне әсә. - Төрлө олимпиадарҙа, бәйгеләрҙә ҡатнаша ҡыҙҙарым һәм улдарым”. Күп балары әсә матурлыҡҡа ғашиҡ, шуға ул сағыу сәскәләр үҫтерергә тырыша. Әле ул экзотик гөлдәр менән ҡыҙыҡһына. Бынан тыш, ул тәмле итеп бешерергә оҫта. Мал тоталар, баҡсаларында йәшелсә үҫтерәләр. 2017 йылда күп балалы әсәгә “Әсәлек даны” миҙалы тапшырылған. 24 ноябрҙә күркәм байрам – Халыҡ-ара әсә көнө билдәләнә. Ошо матур байрам айҡанлы бөгөндән башлап республикабыҙҙың иң әүҙем, дәртле, таһыллы, уңған һәм күп балалы әсәйҙәре “Башҡортостан” гәзитенең “Бәйләнештә” төркөмөндә үткәрелгән “Ҡояш ғүмере теләйем” тип аталған конкурста ҡатнаша. Лира Рәсүл ҡыҙы һәм конкурста ҡатнашҡан башҡа әсәйҙәр өсөн түбәндәге һылтанма буйынса тауыш бирегеҙ, лайктар ҡуйығыҙ һәм байрам айҡанлы изге теләктәрегеҙҙе яҙығыҙ. Тауыш бирергә: https://vk.com/app7198399_-104965500#poll67349ed8ee6d.. Иң күп тауыш йыйған өс әсәйгә стилист Лилиә Мәхмүтованан шәп бүләктәр әҙерләнек! 1-се урын яулаусыға – белгес оҙатыуында магазинға барып, үҙеңә килешле кейем һайлау 2-се урын – стилист ярҙамында булған кейемеңдең килешлеһен һайлап алыу 3-сө урын – башҡорт телендә стиль тураһындағы марафонға сертификат Шулай уҡ тәүге биш урынды яулаған әсәйҙәр тураһында "Башҡортостан" гәзитендә ҙур мәҡәлә донъя күрәсәк, еңеүселәргә милли баҫманың дипломы тапшырыласаҡ. Конкурс 23 ноябргә тиклем дауам итә. Шул көндә, 21.00 сәғәттә, еңеүселәр асыҡланасаҡ. Уңыштар теләйбеҙ! Фотолар: Лира Мәмбәтованың шәхси архивынан.