Мәсетле районында милли проект буйынса мәҙәниәт йорто төҙөлә

Мәсетле районының Яңы Мөслим ауылында яңы күп функциялы мәҙәниәт йорто төҙөлә. Объект “Мәҙәниәт” милли проекты сиктәрендә булдырыла. Ауыл халҡына мәҙәниәт йортон 2021 йылда уҡ төҙөргә вәғәҙә иттеләр. Ул ваҡытҡа урындағы клуб биш йыл эшләмәгән. Эштәр быйыл йәй башланды. 2024 йылдың аҙағына тиклем белгестәр бинаға нигеҙ һалырға, стеналар күтәрергә, ҡыйыҡ һалырға һәм инженер коммуникациялары үткәрергә ниәтләй. Эштәрҙең ҡалған өлөшөн 2025 йылға башҡарыу күҙаллана. Майҙаны 897 квадрат метрлыҡ бер ҡатлы бинала 150 урынлыҡ тамаша залы, хореография залы, китапхана, драма түңәрәге һәм дауалау физкультураһы, аэробика менән шөғөлләнеү өсөн бүлмәләр буласаҡ. Объекттың хаҡы 126,15 миллион һум тәшкил итә. Яңы Мөслимдә мәҙәниәт йорто төҙөлөшөн 2025 йылдың сентябренә тамамлау күҙаллана. Ә бына Балаҡатай районының Яңы Балаҡатай ауылы халҡы район үҙәгендә яңы физкультура-һауыҡтырыу комплексы төҙөлөүен көтә. Хәҙер балалар иҫке спорт мәктәбе бинаһында шөғөлләнергә мәжбүр, унда, йомшаҡ итеп әйткәндә, ҡыҫынҡыраҡ. Спартан шарттарында боксерҙар ҙа шөғөлләнә. Яңы Балаҡатайҙа яңы физкультура-һауыҡтырыу комплексы киләһе йылда төҙөлә башлаясаҡ. Билдәле булыуынса, “Мәҙәниәт” (национальный проект “Культура”) милли проекты Рәсәй Президенты Владимир Путиндың май указы менән булдырылды. Фото: Мәсетле районы хакимиәте.