"Ҡарағай"ға - 55 йыл!

6 ноябрҙә Мәсетле районының Оло Ыҡтамаҡ ауылында Башҡортостан Башлығы Радий Хәбиров “Ҡарағай” шифаханаһына 55 йыл тулыуға арналған тантаналы сарала ҡатнашты. Төбәк етәксеһе шифахананың мөмкинлектәре менән танышты һәм учреждениеның хеҙмәт коллективы менән аралашты. Шифахана директоры Артур Бәҙретдинов “Ҡарағай”ҙың тәпәш таулы курорттарға ҡарауы, уртаса климатлы урман зонаһында урынлашыуы хаҡында һөйләне. Тәбиғәт шарттары һәм заманса матди база шифаханаға төрлө ауырыуҙарҙы иҫкәртеү һәм дауалау өсөн бальнео- һәм климат терапияларын файҙаланырға мөмкинлек бирә. Һауыҡтырыу комплексы өс йоҡо корпусынан һәм биш коттедждан, дауалау-диагностика блогынан, ял үҙәгенән, ресторандан һәм ике ашхананан тора. Йыл һайын шифаханала 7 меңдән ашыу кеше дауалана. Учреждениела 200 белгес эшләй. Сәфәр барышында Башҡортостан Башлығы Хәрби Дан музейын асыу тантанаһында ҡатнашты. Экспозицияның бер өлөшө Советтар Союзы Геройы, Мәсетле районынан лётчик-штурмовик Ҡотдос Латиповтың тормошо һәм батырлығы хаҡында һөйләй. Бынан тыш, килеүселәр учреждениеның үҫешенә арналған фотокүргәҙмәне ҡарай ала. Тантаналы сарала Башҡортостан Башлығы “Ҡарағай” шифаханаһы коллективын 55 йыллыҡ менән ҡотланы һәм иң яҡшы хеҙмәткәрҙәргә республиканың дәүләт наградаларын тапшырҙы. – Эшләй башлағандан алып “Ҡарағай” күп профилле учреждениеға әүерелде, унда һоҡланғыс белгестәр эшләй, алдынғы реабилитация ысулдарына таянып, һөҙөмтәле дауалау өсөн бөтә шарттар булдырылған. Башҡортостан тәбиғәтенең уникаль шифалы үҙенсәлектәре, киң спектры һәм юғары хеҙмәттәр сифаты, лайыҡлы сервис һеҙгә уңыш һәм танылыу килтерҙе, – тине Радий Хәбиров. – Бөгөн беҙ үҙенең хеҙмәте, юғары профессионаллеге менән Башҡортостандың шифахана-курорт тармағы ынйыларының береһен үҫтереүгә ҙур өлөш индергәндәрҙең барыһына ла рәхмәт әйтәбеҙ. Шифахана республикала һәм унан ситтә киң танылыу яулаған, тип билдәләне төбәк етәксеһе. – Республиканан һәм күрше төбәктәрҙән унар меңләгән кеше “Ҡарағай”ҙа сәләмәтлеген нығытты. Ул илдә дүртенсе һәм республикала “Хеҙмәт етештереүсәнлеге” милли проектында ҡатнашҡан икенсе шифахана булды. Был проект сиктәрендә шифаханала заманса технологиялар һәм стандарттар индерелде, – тине Радий Хәбиров. – Беҙҙең барлыҡ шифаханалар махсус хәрби операцияла ҡатнашыусыларға ярҙам итә: гуманитар ярҙам, эсәр һыу ебәрә, яралы яугирҙәргә медицина ярҙамы күрһәтеүҙә, ваҡытлыса урынлаштырыу пункттарын йыһазландырыуҙа үҙен күрһәтә. Бында 185 яугир һәм уларҙың ғаилә ағзалары дауаланды. Шифахананың бай традицияларын һаҡлап ҡалып, заманса реабилитация технологияларын индереп, һеҙ артабан да кешеләргә сәләмәт һәм бәхетле булырға ярҙам итерһегеҙ, тип ышанам. Һеҙгә мөһим һәм изге эшегеҙҙә артабан да уңыштар теләйем. Журналистар менән аралашҡанда Башҡортостан Башлығы республиканың төньяҡ-көнсығышы буйлап эш сәфәренә йомғаҡ яһаны. – Мин Бөрө-Таҙтүбә-Һатҡы юлы буйлап үтергә теләй инем. Был - М-5 “Урал” федераль трассаһына яҡшы альтернатива. Уның буйлап уңайлы һәм тиҙ итеп Балаҡатай районына ла килеп еттек, тағы бер нисә районда булдыҡ. Юл эшләй башланы ла инде, хәҙер беҙ уны юридик яҡтан рәсмиләштереүҙе тамамлайбыҙ. Яңы Балаҡатай ауылында физкультура-сәләмәтләндереү комплексын төҙөү мәсьәләһе киҫкен торҙо. Киләһе йылда ошо эште башлайбыҙ, ә 2026 йылда физкультура-һауыҡтырыу комплексын тапшырабыҙ, – тип билдәләне Радий Хәбиров. – Мәсетле районында Яңы Мөслим ауылында төҙөлөп ятҡан Мәҙәниәт йортон ҡараныҡ. Уны ҡыйыҡ аҫтына индерәләр ҙә инде. Яҡшы, ҙур объект. “Ҡарағай” шифаханаһының юбилейына инеп булманы. Ул - беҙҙең ынйыбыҙ, шуға күрә коллективты ҡотлау һәм яҡшы эштәре өсөн рәхмәт әйтеү мөһим ине. Фото: Башҡортостан Башлығы сайты.