Өфөлә – Айрат Абушахманов аҙналығы

Аҙналыҡты Хәлисә Мөҙәрисованың повесы буйынса ҡуйылған "Бәхет хаҡы" музыкаль мелодрамаһы менән асылды. Ул 2012 йылдан алып аншлаг менән бара, ә кисә 190-сы тапҡыр күрһәтелде! Спектакль тамамланғандан һуң тынмаған дәррәү алҡыштар һәм әйтелгән ихлас рәхмәт һүҙҙәре театр коллективына һәм баш режиссерына иң яҡшы бүләк булды. Был көндө шулай уҡ театр фойеһында Айрат Әхтәм улы ҡуйған спектаклдәрҙең фотокүргәҙмәһе асылды. Бөгөн аҙналыҡты Мәжит Ғафуриҙың повесы буйынса ҡуйылған "Ҡара йөҙҙәр" спектакле дауам итә. Ул Рәсәй милли театр премияһында һәм “Алтын битлек” фестивалендә уңышлы ҡатнашты, ҡуйылыш рәссамы Альберт Нестеров “Костюмдар буйынса иң яҡшы рәссам эше” номинацияһында еңеү яуланы. 2024 йылдың апрелендә Будапешт ҡалаһында Халыҡ-ара театр фестивале сиктәрендә спектакль Венгрия Милли театрының төп сәхнәһендә уйналды. 6 ноябрҙә Зифа Ҡадированың повесы буйынса ҡуйылған “Һинһеҙ килгән яҙҙар” мелодрамаһы күрһәтелә. Спектакль бер кемде лә битараф ҡалдырмай – илата ла, көлдөрә лә. 7 ноябрҙә ҡаҙаҡ драматургы Олжас Жанайдаровтың пьесаһы буйынса “Йот” (“Джут”) спектакле ҡуйыла. Спектакль Рәсәй һәм халыҡ-ара фестивалдәрҙә ҡатнашҡан. 2017 йылда “Алтын битлек” Рәсәй милли театр премияһы һәм фестивале исемлегенә индерелде, Халыҡ-ара театр олимпиадаһы сиктәрендә Венгрия Милли театры сәхнәһендә уйналды. Режиссер Айрат Әхтәм улы был пьесаны ике театрҙа – туған театрында һәм Кәлибәк Ҡыуанысбаев исемендәге ҡаҙаҡ милли музыкаль-драма театрында сәхнәләштергән. Был кис тамашасыларҙы халыҡ-ара проект көтә! Спектаклдең ҡаҙаҡса өлөшө төп нөсхәлә – ҡаҙаҡ телендә уйнала. Бының өсөн Астананан Кәлибәк Ҡыуанысбаев исемендәге ҡаҙаҡ милли музыкаль-драма театры актерҙары – Айман Карпсәйетова һәм Нурсолтан Есен килә. 8 ноябрҙә Айгөл Әхмәтғәлиеваның “Ул бит кисә ине” лирик комедияһы күрһәтелә. Айрат Әхтәм улы был пьесаны Мирхәйҙәр Фәйзи исемендәге Ырымбур дәүләт татар драма театрында ла ҡуйған. Режиссерҙың юбилейы өсөн Өфө һәм Ырымбур театрҙары ижади проект әҙерләгән – Дилара ролен Мирхәйҙәр Фәйзи исемендәге Ырымбур татар драма театры актрисаһы Әлиә Салпикова уйнай. 9 ноябрҙә Айрат Абушахманов 50 йәшлек юбилейы айҡанлы ҡотлауҙар ҡабул итә. Аҙналыҡ Таңсулпан Ғарипованың роман-пенталогияһы буйынса ҡуйылған “Бөйрәкәй” спектакле менән тамамлана. Видео: М. Ғафури исемендәге Башҡорт дәүләт драма театры.