Артур Иҙелбаев йырсы-яугир Радик Динәхмәтовҡа бүләктәр әҙерләгән

Билдәле йырсы, Башҡортостандың халыҡ артисы Радик Динәхмәтов инде йыл ярым махсус хәрби операцияла ҡатнаша. Уның был ҡыйыу аҙымы күптәрҙә һоҡланыу тыуҙырҙы. Билдәле йәмәғәтсе Артур Иҙелбаев та артистың ҡыйыу аҙымына һоҡланып, “Бәйләнештә” төркөмөндәге сәхифәһендә пост ҡуйған, шулай уҡ уға төбәп посылка ла әҙерләгән. “Тормош шундай нәмә, кешене шунда уҡ белеп булмай. Хатта бай тормош тәжрибәһе булһа ла. Бына һинең алдыңда бөркөт күҙле ҡеүәтле кеше тора, шәп егет... Әммә тормошта һынау башлана һәм барлыҡ ҡеүәт ҡайҙалыр юғала. Һинең алдыңда инде меҫкен, ҡалтырап торған йән эйәһе. Ә киреһенсә лә була. Офис буйлап тыныс, күҙгә ташланмай ғына хеҙмәткәр йөрөй, тауышы ла сыҡмай тиерлек, бөтәһе менән дә итәғәтле иҫәнләшә, үҙен-үҙе күрһәтеү менән шөғөлләнмәй. Әммә ауыр минутта ул иң ышаныслы кеше булып сыға. Радик Динәхмәтов - шундайҙарҙан. Беҙ уның менән яҡын дуҫ булманыҡ. Шулай, юлдарыбыҙ киҫешкәне булды, концерттарҙа, сараларҙа осраштыҡ. Башҡорт һәм татар телдәрендә “Аҙна” һәм “Атна” гәзиттәрен сығарғанда, ул ҡайһы берҙә беҙҙең баҫмаларҙың геройы булды. Әммә йыш түгел, сөнки унан да сағыу башҡорт-татар эстрадаһы йондоҙҙары бар ине. Мин уны бик аҡыллы, алсаҡ, дуҫтарса күңелсәк, бер аҙ оялсан егет итеп хәтерләйем. Бәлки, был оялсанлығы уға ҙур масштабтағы йондоҙ булырға ҡамасаулағандыр, әммә ул, һис шикһеҙ, һәләтле. Сәхнә бик тыйнаҡ кешеләрҙе яратмай... Бына ил өсөн һынауҙар ваҡыты етте. Радик үҙ теләге менән махсус хәрби операцияға яҙыла. Тауышланмай, шауламай ғына Тыуған илде яҡларға китте. Мин хайран ҡалдым. Был шул тыныс Радик Динәхмәтовмы? Сикһеҙ ихтирам! Уның тураһында иҫкә төшөргән һайын, уға яҡшылыҡ эшләргә теләйем. Уртаҡ дуҫтарыбыҙҙың Радик хеҙмәт иткән урынға гуманитар йөк менән барыуын белгәс, бик шатландым. Хәҙер улар йыйынды. Ҡәҙерле Радик! Беҙҙән дә бәләкәй бүләктәр ҡабул ит. Бында бал, умартасылыҡ тауарҙары, үлән, һарымһаҡ һәм башҡа бәләкәй күстәнәстәр. Улар һиңә, һинең хәрби иптәштәреңә һәм хеҙмәт иткән санитар ротта хеҙмәткәрҙәренә оҡшар, тип өмөтләнәм. Үҙеңде һаҡла, ҡәҙерле дуҫым. Иҫән-һау һәм еңеү менән көтәбеҙ!” – тип белдерҙе Артур Иҙелбаев. Фото: скриншот. Видеояҙма сығанағы: https://vk.com/video324000246_456240013?list=0c1334f1c9d927853b