Үҙеңде кредит алыуҙан нисек тыйырға?

2030 йылға тиклем Финанс грамоталылыҡты күтәреү һәм финанс мәҙәниәтен булдырыу стратегияларын тормошҡа ашырыу маҡсатында быйыл 4 октябрҙән 25 декабргә тиклем “Минең финанстарым” Бөтә Рәсәй мәғариф эстафетаһының III этабы була. Был этаптың темаһы – “Яуаплы кредит”. Эстафетаны Рәсәйҙең Финанс министрлығы ойоштора. Оператор – Рәсәй Финанс министрлығының Финанс ғилми-тикшереү институты. Был этап барышында мәғариф, белем биреү, мәғлүмәт рәүешендәге саралар ойошторола. Улар Рәсәй граждандарының йәшәү кимәле һәм сифаты булған финанс мәҙәниәтте формалаштырыуға йүнәлтелгән. Белеүебеҙсә, кредит буйынса мутлыҡ осраҡтары йыш теркәлә. Был аяныслы хәлгә ҡулында банк картаһы һәм кредиты булғандар тарый. Хәҙер, ҡыҙғанысҡа ҡаршы, күптәрҙең, шул иҫәптән өлкән йәштәгеләрҙең, заман “остап бендер”ҙарының тоҙағына эләгеп, аҡсаһын биреү осраҡтары күбәйҙе. Ошондай аяныслы хәлдәрҙе кәметеү өсөн дәүләт бер алым уйлап сығарған – 2025 йылдың 1 мартынан граждандар үҙҙәрен кредит алыуға тыйыу ҡуя аласаҡ. Был хаҡта Рәсәй Хөкүмәтенең матбуғат хеҙмәте хәбәр итте. Әлеге ваҡытта Рәсәй Федерацияһы властары ғаризаны биреү һәм яуап алыу процедураһын раҫлаған. Кредит алыуға тыйыу тураһындағы ғаризаны ике юл менән тапшырып буласаҡ. Беренсеһе – “Дәүләт хеҙмәттәре” порталы аша – унан Кредит тарихтары бюроһына мәғлүмәт ебәреләсәк һәм шәхси кабинетҡа ҡабул ителгән ҡарар тураһында хәбәр киләсәк. Икенсеһе – үҙеңә Күп функциялы үҙәккә барып ғариза яҙыу. Был осраҡта ҡарар граждандың кредит тарихтары бюроһындағы шәхси архивында күренәсәк. Бынан тыш, яуапты Күп функциялы үҙәктә лә алып буласаҡ. Ошондай уҡ ике юл менән – “Дәүләт хеҙмәттәре” порталы аша һәм Күп функциялы үҙәктә – үҙеңә кредит алыуға тыйыуҙы юҡ итергә мөмкин буласаҡ. Мутлашыусыларҙың кешеләргә алдап кредит юллатыуы, унан был аҡсаны үҙләштереүе осраҡтарының күбәйеүе сәбәпле ҡабул ителгән был сара ҡулланыу займдарына һәм микрофинанс ойошмаларына ҡағыласаҡ. Кредит һәм микрофинанс ойошмалары кемгәлер кредит бирер алдынан мотлаҡ тыйыу бармы-юҡмы икәнлеге тураһында белергә тейеш. Әйткәндәй, хәҙер күптәр бурысҡа батып бөткән инде. Шуға күрә түләй алмаған осраҡта ҡурҡып, ҡасып ятмайынса, банкка барып, проблеманы хәл итеү юлдарын эҙләү зарур. Ошо осраҡта ғына “неустойка”, йәғни штраф күләмен кәметеп була. Автор фотоһы.