Республикала аҙыҡ-түлек һәм эшкәртеү сәнәғәте өлкәһендә етештереү һиҙелерлек артты. Һуңғы биш йылда аҙыҡ-түлек етештереү – 29 процентҡа, ә эсемлектәр етештереү 12 процентҡа артты. Башҡортостан Башлығы Радий Хәбиров уҙғарған аҙналыҡ оператив кәңәшмәлә республика вице-премьеры – ауыл хужалығы министры вазифаһын башҡарыусы Илшат Фәзрахманов ошо хаҡта хәбәр итте. – 2024 йылда предприятиелар 117 миллиард һумлыҡ аҙыҡ-түлек һатҡан. Бөтә төп позициялар буйынса тиерлек аҙыҡ-түлек етештереү күләменең артыуын күҙәтәбеҙ, – тип һөйләне Илшат Фәзрахманов. Ит һәм ит ярымфабрикаттары, ярма, үҫемлек майҙары, шәкәр һәм сырҙар, шулай уҡ алкоголһеҙ эсемлектәр етештереү иң ҙур үҫеш күрһәткестәрен күрһәткән. Аҙыҡ-түлек продукцияһын етештереү күләменең артыуына тармаҡҡа дәүләт ярҙамы саралары булышлыҡ итте. Атап әйткәндә, 2022 йылдан Башҡортостанда Аҙыҡ-түлек һәм эшкәртеү сәнәғәтен үҫтереү концепцияһы ғәмәлгә ашырыла, уның буйынса аҙыҡ-түлек етештереүселәргә яңы ҡорамал һәм техника һатып алыуға сығымдарҙың 40 процентҡа тиклеме ҡаплана. 2024 йылда был маҡсатҡа бөтәһе 100 миллион һум йүнәлтелә. Средстволарҙы 46 предприятие алған да инде. Бынан тыш, 2024 йылдың ете айында ауыл хужалығы кооперативтарында эшкәртеүҙе үҫтереүгә һәм сеймал һатып алыуға 10 кооператив өсөн 19 миллион һум самаһы аҡса бүленде. Кәңәшмәлә шулай уҡ аҙыҡ-түлек сәнәғәте өлкәһендә инвестиция проекттарын тормошҡа ашырыу ҡаралды. Республикала 12,9 миллиард һумлыҡ 19 ҙур проект өҫтөндә эшләйҙәр. Улар иҫәбендә – “Башҡорт туңдырмаһы” компанияһы базаһында йылына туңдырма сығарыуҙы 10 мең тоннаға тиклем арттырыу, Дәүләкән ит ярымфабрикаттары комбинатын үҫтереү, Мәләүез һөт-консерва комбинаты базаһында ҡоро һөт һәм балалар туҡланыуы өсөн компоненттар етештереү. Башҡортостанда “Хәләл” стандарттары буйынса аҙыҡ-түлек сертификацияһын үҫтереүгә ҙур иғтибар бүленә, уны республиканың 43 компанияһы етештерә. Башҡортостан шулай уҡ “Рәсәй сифат системаһы-Хәләл” компетенциялар үҙәге вәкиллеген ойошторған тәүге Рәсәй төбәге булды. Аҙыҡ-түлек сәнәғәте продукцияһын экспортлау ҙа юғары темптар менән үҫешә. Уҙған биш йылда уның күләме өс тапҡырға артҡан. Республиканан етештерелгән тауарҙар бөтәһе 44 илгә, шул иҫәптән Һиндостанға, Ҡытайға, Алжирға, Ҡаҙағстанға, Беларусьҡа, Үзбәкстанға оҙатыла. 2024 йылда республика сит илгә 460 мең тоннанан ашыу агросәнәғәт комплексы продукцияһын һатҡан. Радий Хәбиров агросәнәғәт комплексы хеҙмәткәрҙәренә яҡшы етештереү күрһәткестәре һәм экспортты үҫтереү өсөн рәхмәт белдерҙе. Фото: Башҡортостан Башлығы сайты.