Махсус хәрби операция биләмәһендәге яугирҙәр ҡыҫҡа ваҡытҡа ялға ҡайтыуҙарын дауам итә. Өфө ҡалаһының Ленин районы хакимиәте башлығы Олег Котов шундай һәр бер хәрби менән шәхсән осраша. Был юлы район башлығы "Кузнец" позывнойлы яугир менән аралашҡан. Әңгәмә барышында яҡлаусыбыҙ нисек хеҙмәт итеүе, яҡташтарыбыҙҙың ҡайһыһы менән махсус операция үткәреү зонаһында бәйләнешкә инеүе хаҡында һөйләгән. “Яугир маскировка селтәрҙәре әҙерләүҙәрен һораны: «Ал елкәндәр» йәштәр клубтары берләшмәһе ҡарамағында Ленин районының «СВиРОДные» оҫта ирекмәндәре эшкә тотондо ла инде. Маскировка селтәрҙәре дошмандан позицияларҙы, техниканы, ҡоралдарҙы һәм снайперҙарҙы йәшерергә ярҙам итә”, -тип яҙған район хакимиәте башлығы. Әйткәндәй, маскировка селтәрҙәрен үреүгә бар кешеләр ҙә ҡушыла ала. Бөгөн республиканың күпселек ҡала һәм ауылдарында тап ошо эш менән шөғөлләнгән ирекмәндәр бихисап. Уларҙың эштәренә тик һоҡланырға ғына ҡала. Тиҙерәк МХО-лағы барлыҡ яугирҙәргә лә иҫән -һау тыуған яҡтарына бөтөнләйгә ҡайтырға яҙһын! БЕЛЕШМӘ ӨСӨН Хәтерегеҙгә төшөрәбеҙ, Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Өфөлә "Төнъяҡ амурҙары" исеме аҫтында граждандарҙы контракт буйынса хәрби хеҙмәткә һайлап алыу пункты эшләй башланы. Хәҙер РФ Оборона министрлығы менән контракт төҙөргә теләүселәргә белешмәләр йыйыу һәм медицина тикшереүе үтеү өсөн төрлө адрестар буйынса йөрөргә кәрәкмәй: быларҙың барыһын да бер урында һәм тәүлек эсендә эшләргә мөмкин. Пунктты Өфө, Элеватор урамы, 15-се йорт адресы буйынса урынлашҡан "Черемушки" һауыҡтырыу шифаханаһы базаһында астылар. Ул ҡалаға көньяҡтан ингән ерҙә, Тирмән комбинаты районында урынлашҡан. Үҙәккә Башҡортостандан да, башҡа төбәктәрҙән дә контракт буйынса хәрби хеҙмәткә инергә теләгән 18-65 йәшлек ир-егеттәр мөрәжәғәт итә ала. Уларҙың теркәлеү урыны иҫәпкә алынмай.Үҙегеҙ менән паспорт, хәрби билет, ғаиләгеҙ, белемегеҙ тураһында документтар, СНИЛС һәм ИНН алырға кәрәк. Үҙәктә хәрби комиссариат хеҙмәткәрҙәре, табиптар һәм банк вәкилдәре эшләй. Кандидаттарҙың мөмкин тиклем тиҙерәк медицина комиссияһын үтеү, анализдар тапшырыу, документтарын тәртипкә килтереү, кәрәк булғанда "Мир" банк картаһын алыу мөмкинлеге бар. Тап ошо картаға бер тапҡыр бирелә торған түләү һәм эш хаҡы киләсәк. Шулай уҡ бында төндө үткәреү өсөн номерҙар фонды, өс тапҡыр ашатыу хеҙмәте ҡаралған. Былар барыһы ла бушлай. Үҙәктән граждандар хәрби командалар составында шунда уҡ хеҙмәт урынына китә. Алдан хәбәр итеүебеҙсә, Оборона министрлығы менән килешеү төҙөгәндәргә Өфө ҡалаһы бер тапҡыр бирелә торған аҡсалата түләү күләмен 300 меңдән 400 мең һумға тиклем арттырҙы. Стәрлетамаҡтар ҙа контрактсыларға ошо сумманы түләйәсәк. Шулай итеп, эш хаҡын иҫәпкә алғанда, түләүҙәрҙең дөйөм суммаһы 3 825 000 һум тәшкил итәсәк. Башҡортостанда контракт хеҙмәте тураһында тулыраҡ мәғлүмәтте башбат.рф сайтында йәки Ситуация үҙәгендә +7 (347) 218-19-19 телефоны буйынса алырға мөмкин. Шулай уҡ 122 йәки 8 800 550 5525 телефондарына шылтырата алаһығыҙ. Фото һәм сығанаҡ: Олег Котовтың "Бәйләнештә"ге сәхифәһенән.