Өфөлә III Бөтә Рәсәй "Ҡаршылыҡтарҙы емереп" форум-күргәҙмәһе була

Форум, ғәҙәттәгесә, Өфөлә уңайлы мөхит булдырыу өсөн техник реабилитация һәм реабилитация ҡорамалдары етештереүселәрҙе йыя, улар – Приморье крайынан алып Калининградҡа ҡәҙәр. Фекер алышыу майҙансыҡтарында, форсайт сессияһында, түңәрәк өҫтәлдәрҙә эксперттар, власть, бизнес, йәмәғәт ойошмалары вәкилдәре мөмкинлектәре сикләнгән кешеләрҙе комплекслы реабилитациялауға ҡағылған яңы закондарҙы, реабилитация тармағын үҫтереү стратегияһын, илдә социаль йоғонто яһау проекттарын үҫтереү юлдарын һәм һаулыҡ мөмкинлектәре сикләнгән кешеләрҙең йәшәү сифатын яҡшыртыу буйынса инновацион ҡарарҙарға бәйле башҡа бик күп мәсьәләләрҙе тикшерергә ниәтләй. Форумды Башҡортостан Республикаһы Хөкүмәте һәм Стратегик башланғыстар агентлығы ойоштора. Унда Стратегик башланғыстар агентлығының генераль директоры Светлана Чупшева, Рәсәй Федерацияһы Хеҙмәт министрлығының инвалидтар мәсьәләләре буйынса департаменты директоры Дмитрий Лигомина, «Мөмкинлектәр технологиялары» социаль инновацияларҙы үҫтереү үҙәге һәм «АУРА-Тех» ярҙамсы технологиялар баҙарында ҡатнашыусыларҙың милли ассоциацияһы етәксеһе Иван Бирюков һәм башҡа эксперттар ҡатнаша. – 2023 йыл йомғаҡтары буйынса Башҡортостан тәүге тапҡыр Стратегик башланғыстар агентлығы ойошторған Тормош сифаты рейтингындағы алдынғы 20 төбәк иҫәбенә инде. Республика, бер юлы 13 урынға күтәрелеп, 12-се урынды биләне, – тине Башҡортостандың ғаилә, хеҙмәт һәм халыҡты социаль яҡлау министры вазифаһын башҡарыусы Ленара Иванова. – Тиҙҙән Рәсәйҙә беренсе булып “Ярҙам платформаһы” һанлы навигаторын эшләтеп ебәрәсәкбеҙ. Башҡортостан Республикаһы Премьер-министры вазифаһын башҡарыусы Андрей Назаров Стратегик башланғыстар агентлығы етәксеһе Светлана Чупшева менән платформаны эшләтеү мәсьәләләрен тикшерҙе. “Ҡаршылыҡтарҙы еңеп” форумының төп темаһы – 18 йәштән өлкән булған һаулыҡ мөмкинлектәре сикләнгән кешеләрҙе комплекслы реабилитациялау системаһын булдырыу. — Республика етәксеһе Радий Хәбировтың инициативаһы менән Башҡортостанда 18 йәштән өлкән һаулыҡ мөмкинлектәре сикләнгәндәргә ярҙам күрһәтеүҙең яңы сараһы - реабилитация сертификаты индерелде. Уның менән йыл һайын 1700-ҙән ашыу кеше файҙаланырға тейеш, тип планлаштырабыҙ. Быйыл сентябрҙән алып 52,5 меңешәр һумлыҡ 400-гә яҡын сертификат бирелде. Был механизм өлкәндәрҙе социаль реабилитациялау мәсьәләһен хәл итеүҙә һиҙелерлек ярҙам итер, – тине Ленара Иванова. Спикер шулай уҡ, республикала бындай сертификаттар 2019 йылдан алып һаулыҡ мөмкинлектәре сикләнгән балаларға ла бирелеп килә, тип билдәләне. Үткән йылда дөйөм суммаһы 95 миллион һумдан ашыу булған 2282 сертификат бирелгән. “Ҡаршылыҡтарҙы емереп” форумының сағыу ваҡиғалары – балалар инклюзив фестивале, һуҡырҙар командалары араһында футбол турниры, "Ҡарасҡы" (“Чучело”) повесы буйынса “күренмәҫ” спектакль, кино ҡарау, инклюзив мода күрһәтеү, үҙенсәлекле оҫталар эштәренән торған хәйриәлек йәрминкәләре, оҙатып йөрөүсе эттәр ҡатнашҡан оҫталыҡ дәрестәре һәм башҡа саралар. Форум сараларында ҡатнашыу өсөн форум-күргәҙмәнең сайтында теркәлергә мөмкин. Сығанаҡ: БР Хөкүмәтенең рәсми сайты.