Дмитрий Чернышенко вуз-ара кампус төҙөлөшөн баһаланы

Визит 17-19 октябрҙә баш ҡалала үткән «Рәсәй – спорт державаһы» халыҡ-ара спорт форумына бәйле эш сәфәренә ярашлы ойошторолдо. «Башҡортостан Республикаһы дәүләт ярҙамы саралары менән әүҙем файҙалана. "Рәсәй – спорт державаһы" форумында төбәк үҙенең спорт ҡаҙаныштарын күрһәтте, ә колледжды һәм вуз-ара кампус объекттарын ҡарап сығыу һөҙөмтәһендә беҙ "Профессионалитет" федераль проектында һәм "Фән һәм университеттар" милли проектында ҡатнашыуҙың аныҡ һөҙөмтәләрен күрҙек. Артабан күп кенә ярҙам саралары, шул иҫәптән заманса кампустар селтәрен булдырыу Президент Владимир Путиндың ҡушыуы буйынса булдырылған "Йәштәр һәм балалар" яңы милли проектына күсәсәк. Төбәк бөтә ил һәм халыҡ мәнфәғәтенә эшләүен дауам итер, мәғариф, фән һәм инновациялар синергияһы өсөн бөтә шарттар булдырыр, тип ышанам», - тип билдәләне вице-премьер. Артабан Дмитрий Чернышенко Башҡортостан Хөкүмәте Премьер-министры вазифаһын башҡарыусы Андрей Назаров һәм РФ Фән һәм юғары белем биреү министры урынбаҫары Айрат Ғәтиәтов менән бергә Өфө вуз-ара студенттар кампусының икенсе сиратын төҙөү майҙансығын һәм лабораторияларҙы ҡараны. «Икенсе сират объекттарын төҙөү тейешле кимәлдә дауам итә. Майҙаны 5,5 мең квадрат метрлыҡ геном үҙәге төҙөлә, төп бина өсөн әҙерлек эштәре һәм нигеҙ соҡоро һалына. Бурыс – барыһын да ваҡытында эшләү һәм төҙөлөштөң юғары сифатын тәьмин итеү. Билдәләп үтергә кәрәк, яңы кампустағы барлыҡ объекттарҙың дөйөм майҙаны 140 мең квадрат метрҙан ашыу майҙанды биләйәсәк», - тине министр урынбаҫары Айрат Ғәтиәтов. Бынан тыш, Дмитрий Чернышенко һәм Андрей Назаров Өфө радиоэлектроника, телекоммуникациялар һәм хәүефһеҙлек колледжында улып, уҡыу йортоноң инфраструктураһын баһаланы. Колледж ИТ, элемтә, мәғлүмәт һәм янғын хәүефһеҙлеге өлкәһендә, тимер юл һәм машиналар эшләү тармағы өсөн белгестәр әҙерләй. Сығанаҡ: pravitelstvorb.ru