Дмитрий Чернышенко: Спорт – ул милләт-ара диалог һәм тыныслыҡты нығытыу ҡоралы

Өфөлә “Рәсәй – спорт державаһы” халыҡ-ара спорт форумында “Спорт – киләсәккә комплекслы ҡараш” темаһына пленар ултырыш үтте. Унда Рәсәй Президенты Владимир Путин сығыш яһаны. “Перспективалар, донъя спортының киләсәге ысынлап та етди, предметлы фекер алышыуға, замандың ябай булмаған саҡырыуҙарына нисек яуап эҙләүгә, халыҡ-ара спорт ғаиләһенең тарҡалыуына юл ҡуймаҫҡа, спорт икеләтә стандарттарҙан, боҙолған ҡағиҙәләрҙән, кәмһетеүҙәрҙән, шул иҫәптән атлеттарҙың гражданлығы һәм милләте билдәһе буйынса айырыуҙан таҙартыуға мохтаж”, – тине дәүләт башлығы. Пленар ултырыштың модераторы – Рәсәй Хөкүмәте Рәйесе урынбаҫары Дмитрий Чернышенко. Тәүҙә ул Президенттың һүҙҙәрен әйтеп ишеттерҙе: “Илебеҙ бөйөк атлеттарҙың, еңеүҙәрҙең һәм рекордтарҙың тыуған ере, планетаның алдынғы спорт державаларының береһе булды һәм булып ҡала”. Вице-премьер билдәләүенсә, спортты үҫтереүҙә уңыштарға бөтә кимәлдәге власть органдарының, спорт федерацияларының, йәмғиәттәрҙең, лигаларҙың, клубтарҙың, киң мәғлүмәт сараларының тырышлығы, шулай уҡ граждандарҙың үҙ өлөшө ярҙамында өлгәшелә. Хөкүмәт Рәйесе урынбаҫары һүҙҙәренсә, спорт – ул милләт-ара диалогтың ҡеүәтле ҡоралы, тыныслыҡ, дуҫлыҡ, хеҙмәттәшлек булдырыу сараһы, шул иҫәптән халыҡ-ара аренала ла. “Рәсәй һәр саҡ принципҡа тоғро ҡала: спорт – ул универсаль аралашыу теле, һәм ул сәйәсәттән ситтә булырға тейеш. Үҙ яғыбыҙҙан беҙ ғәҙел, асыҡ спорт көрәше идеалдарын эҙмә-эҙлекле яҡлайбыҙ һәм спорт суверенитетын нығытыуҙы дауам итәбеҙ. Хәҙер беҙ барыбыҙ ҙа Президент тирәләй тупланғанбыҙ һәм ошо мәлде спорт менән идара итеүҙең заманса системаһын төҙөү өсөн файҙаланабыҙ, тармаҡтың бөтә ҡатнашыусыларын, шул иҫәптән йәмәғәт ойошмаларын да төп процестарға йәлеп итәбеҙ”, – тине Дмитрий Чернышенко. Рәсәй сәйәсиләштерелгән халыҡ-ара спорт ойошмаларының юрисдикцияһынан азат халыҡ-ара ярыштарҙың яңы форматтарын үҫтереүен дауам итә. Мәҫәлән, “Киләсәк уйындары” проекты. Вице-премьер спорт инфраструктураһын үҫтереүҙең һәм халыҡтың физик культура һәм спорт менән шөғөлләнеүгә йәлеп итеү кимәлен күтәреүҙең мөһимлеген һыҙыҡ өҫтөнә алды. “Президент Владимир Путин 2030 йылға граждандарыбыҙҙың 70 процентын физик культура һәм спорт менән даими шөғөлләнеүгә йәлеп итеү бурысын ҡуйҙы. Уны хәл итеү өсөн тиҫтә йыл аҙағына тиклем тармаҡты үҫтереүҙең төп йүнәлештәрен билдәләгән Физик культураны һәм спортты үҫтереү стратегияһы ҡабул ителде. Һөҙөмтәләрҙең ысынлап һиҙелерлек булыуын күрәбеҙ. Бөгөн 56 проценттан ашыу кеше физкультура һәм спорт менән шөғөлләнә, ә спорт объекттары менән тәьмин ителеш 61,5 процентҡа етте. Рәсәйҙә төрлө кимәлдәге 350 мең самаһы спорт ҡоролмаһы эшләй. Капиталь булмаған ҡоролмалар төҙөүгә средстволар бюджет тураһындағы законда ла планлаштырылған. Был 19 миллиардтан ашыу, ул йыл һайын 350 спорт объектын төҙөргә мөмкинлек бирергә тейеш”, – тине Дмитрий Чернышенко. 2023 йылда 72 ҙур спорт объекты файҙаланыуға тапшырылған. Быйылғы план – тағы ла 85. “Бизнес-спринт” федераль проекты буйынса былтыр 150-ләгән аҡыллы майҙансыҡ һәм модулле зал асылды, быйыл тағы 97-һен сафҡа индереү күҙаллана. ГТО системаһында 24 миллион самаһы кеше теркәлгән. Шуларҙың 11 миллионға яҡыны нормативтарҙы уңышлы тапшырған һәм билдәләр алған. Башҡортостан Хөкүмәте Премьер-министры вазифаһын башҡарыусы Андрей Назаров Башҡортостандың спорт тармағындағы дәүләткә ҡарамаған ойошмаларға ярҙам итеү өлкәһендәге тәжрибәһе менән уртаҡлашты. “Дәүләт һәм муниципаль спорт учреждениеларына ярҙам итеү менән бер рәттән беҙ дәүләткә ҡарамаған ойошмаларҙы ла әйләнешкә йәлеп итәбеҙ һәм уларға булышлыҡ итәбеҙ. Республикала физкультура-спорт йүнәлешендәге 133 йәмәғәт берекмәһе теркәлгән, шуларҙың 122-һе - аккредитацияланған төбәк спорт федерациялары”, – тине Премьер-министр вазифаһын башҡарыусы. Сарала шулай уҡ Беларусь Республикаһының спорт һәм туризм министры Сергей Ковальчук, Ираҡ Республикаһының йәштәр эштәре буйынса министры Әхмәт Әл-Мубарка, Непал Федератив Демократик Республикаһының йәштәр эштәре һәм спорт буйынса министры Теджу Лал Чаудхари, Бөтә Рәсәй Фиджитал-спорт федерацияһы президенты Никита Нагорный, Венесуэланың Боливариан Республикаһының йәштәр эштәре һәм спорт буйынса халыҡ власы министры Арнальдо Санчес, Тоголез Республикаһының спорт һәм ял министры Лиди Бесси-Кама, Вологда өлкәһе губернаторы урынбаҫары Александр Поветкин, Рәсәйҙең художество гимнастикаһы буйынса йыйылма командаһының баш тренеры Ирина Винер һәм башҡалар ҡатнашты. Фото һәм сығанаҡ: http://government.ru/news/53037/