Башҡортостанда һәм Татарстанда популяр йырсыларҙың береһе Гүзәл Уразованың гастролдәре алыҫ Себер яҡтарында дауам итә. Төмән ҡалаһында үткән концерттан һуң йырсы үҙенең “Бәйләнештә”ге сәхифәһенә видеорепортаж ҡуйған. Ә уның аҫтындағы комментарийҙарға күҙ һалғанда, концертты тәнҡитләүселәр ҙә, хуплаусылар ҙа бар. Бер нисәүһенә туҡталып китәйек. “Гүзәл, барыһы ла яҡшы. Әммә прожекторҙар менән артығы килеп сыҡты. Күҙҙәремде аса алмайынса ултырҙым”. “Концерт супер! Әммә килешәм, ут операторы яңылышҡан. Шул тиклем күп күлдәктәр кейеп сыҡтығыҙ, сәхнәлә шул тиклем талантлы егеттәр булды, әммә беҙ һындарҙы ғына төҫмөрләнек, сөнки ут һеҙҙең арттан залға йүнәлтелгән ине. Зал да дәртләнеп китергә теләй, сөнки концертты барыбыҙ ҙа көттөк, йырҙар ҙа бик матур, ә беҙ һеҙҙең йөҙҙәрҙе һәм эмоцияларҙы күрмәнек. Тауышығыҙы ғына ишеттек”. Һәр нәмәлә сама белеү кәрәк шул. Тамашасыларҙың тәнҡиттәренә йырсылар бер аҙ ҡолаҡ һалыр һәм сығыш яһағанда бер-береһенән арттырып, төрлө төҫтәге уттарҙы яҡтыртыуҙы кәметер тигән ышаныста ҡалайыҡ. Әйткәндәй, Сибай ҡалаһында ла тиҙҙән ике көн рәттән Гүзәл Уразованың концерттары үтәсәк. Күҙҙе аса алмайынса ултырыр өсөн концертҡа барырғамы әллә Гүзәл Уразованың йырҙарын интернеттан ғына тыңларғамы... Фото һәм сығанаҡ: Гүзәл Уразованың “Бәйләнештә”ге сәхифәһенән.