Күңел түренән
Иллене үткән, ире менән оҙайлы йылдар йәшәгән ханымдың һөйләгәндәре күптәргә фәһем булыр тип уйлайым. Бигерәк тә яңы өйләнешкән парҙарға һабаҡ.
- Күршеләге йәш килен иренән ҡайта ла китә, ҡайта ла китә. Ҡарайым да йәлләйем быларҙы. Шунан киленгә үҙ тарихымды һөйләнем. Һеҙгә лә һөйләйем.
Алты йыл йәшәгәс бер төн ҡайтманы ирем. Телефонын алмай. Әсәһенә шылтыраттым да: “уй, ирем ҡайтманы, һеҙгә барам, утын ярып бирәм, ти ине. Миңә шылтыратырға онотҡандыр арып. Йоҡламаһа, телефонын зарядкаға ҡуйып шылтыратһын әле. Балалар атаһын таптыра, һөйләшһен әле” тинем бер тында.
Ҡәйнәм ҡурҡып китте. “Килмәне бит улым, ҡайҙа ғына булды икән?! Ҡана шылтыратайым үҙем”,-тип борсолоп һүндерҙе аппаратын.
Мин көтәм. Бер нисә минуттан ҡәйнәм шылтырата. “Улым хәҙер ҡайтыр, сәйеңде ҡуя, ашыңды йылыта тор” ти.
Ысынлап та ҡайтып инде ярты сәғәттән, күңеле күтәренке, иҫерек...
Тағы бер хәл. Ирем бер ҡатын менән башы буталып, шуға әүрәп, ҡаңғырып, мине һәм балаларҙы төн уртаһында өйҙән ҡыуып сығарҙы. Аҡсам бар ине әҙерәк, биш район аша ҡайтып киттем ҡара төндә. Бер аҙна үтте, балалар илаша башланы. Ҡәйнәм бер шылтырата. “Килен ҡайт, балаларҙы етем итмә, мине ҡалдырма орлоҡһоҙ ҡыяҡ итеп” ти.
Ҡәйнәмә “ирем үҙе ҡыуҙы, үҙ теләгем менән китмәнем. Килеп алһын”,-тинем. Етмәһә ишеттерәм бала геүелдәгәнен. Иремә лә шылтыратам да, балалар тауышын тыңлатам, һөйләштерәм ҙур бала менән. Бала һөйләй бит инде һағыныуын, яңылыҡтарын. Үҙем һөйләшмәйем. Икенсе аҙна үтте. Ҡоро һөлдәгә әйләндем, ябыҡтым, һаман һыр бирмәйем. Бер төн уртаһында ир шылтырата. Такси ебәрәм, ҡайтығыҙ ти. “Ҡайтырбыҙ, тик кем ҡыуған шул килеп алһын, таксист юлда аҙашыр, төнгә йоҡоһонан юлда осор, үҙең дә кил иптәшкә”, тинем.
Бер сәғәт етте төйөнсөктәрҙе төйнәргә. Оло юлды дүрт сәғәттә үтеп килеп еттеләр таң һыҙылғанда. Туғандарым кире ебәргеләре килмәй илап ҡалды. Минең ауыр тормошома ышанған инеләр шунда.
Быларҙың барыһы йәш саҡта ҡалды. Хәҙер ир ҡыуғанға сығып китмәһәм ярар ине, үҙен сығарып ебәрер инем. Тик иҫереп, икенсе ҡатындарға йөрөп маташҡан ирем дә тынысланды хәҙер. Уларҙың да переходный мужской возрасы булалыр. Шулай, йәш килендәр, айырылырға ашыҡмағыҙ!
Гүзәл Иҫәнгилдина яҙып алды.
