Старый стиль
5 октября
ПЯТНИЦА
Новый стиль
18 октября
Седмица 17-я по Пятидесятнице
Постный день.
Мц. Харити́ны Амисийской (Понтийской) (304)
Тропарь, глас 4
А́гница Твоя́, Иису́се, Харити́на/ зове́т ве́лиим гла́сом:/ Тебе́, Женише́ мой, люблю́/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди, я́ко да ца́рствую в Тебе́,/ и умира́ю за Тя, да и живу́ с Тобо́ю;/ но, я́ко же́ртву непоро́чную, приими́ мя с любо́вию, поже́ршуюся Тебе́./ Тоя́ моли́твами,// я́ко Ми́лостив, спаси́ ду́ши на́ша.
Кондак, глас 2
Кре́пким ра́зумом, Харити́но,/ ду́шу утве́рждши ве́рою,/ бори́теля врага́ я́ве посрами́ла еси́,/ у Христа́ предста́, всеблаже́нная,/ червлени́цу от крове́й твои́х нося́щи,/ и при́сно со А́нгелы ра́дуешися,// моли́ за ны, страстоте́рпице.
свтт. Московских Петра, Феогно́ста, Алекси́я, Киприа́на, Фо́тия, Ио́ны, Геро́нтия, Иоаса́фа, Макария, Фили́ппа, И́ова, Ермоге́на, Ти́хона, Петра, Филаре́та, Инноке́нтия и Мака́рия, Московских и всея России чудотворцев
Тропарь, глас 4
Первопресто́льницы Росси́йстии,/ и́стиннии храни́телие апо́стольских преда́ний,/ столпи́ непоколеби́мии, правосла́вия наста́вницы,/ Пе́тре, Алекси́е, Ио́но, Фили́ппе и Ермоге́не,/ Влады́ку всех моли́те/ мир вселе́нней дарова́ти,// и душа́м на́шим ве́лию ми́лость.
Кондак, глас 3
Во святи́телех благоче́стно пожи́сте,/ и лю́ди к Богоразу́мию наста́висте, и до́бре Бо́гу угоди́сте,/ сего́ ра́ди от Него́ нетле́нием и чудесы́ просла́вистеся,// я́ко ученицы́ Бо́жия благода́ти.
Величание
Велича́ем вас,/ святи́телие Христо́вы/ Пе́тре, Алекси́е, Ио́но, Фили́ппе и Ермоге́не,/ и чтим святу́ю па́мять ва́шу:/ вы бо мо́лите за нас// Христа́ Бо́га на́шего.
Святителю Петру Московскому, митрополиту Киевскому и всея Руси чудотворцу
Тропарь, глас 4
Я́же пре́жде безпло́дная земле́,/ ны́не весели́ся:/ се бо Христо́с свети́льника в тебе́ показа́,/ я́ве сия́юща в ми́ре,/ и исцелева́юща неду́ги и боле́зни на́ша./ Сего́ ра́ди лику́й и весели́ся со дерзнове́нием:// святи́тель бо есть Вы́шняго сия́ соде́ловаяй.
Кондак, глас 8
Взбра́нному и ди́вному на́шея земли́ чудотво́рцу,/ днесь любо́вию к тебе́ притека́ем, песнь Богоно́се плету́ще,/ я́ко име́я дерзнове́ние ко Го́споду,/ многообра́зных изба́ви нас обстоя́ний, да зове́м ти:// ра́дуйся, утвержде́ние гра́ду на́шему.
Молитва
О вели́кий святи́телю, пресла́вный чудотво́рче, Росси́йския Це́ркви первопресто́льниче, гра́да Москвы́ храни́телю и о всех нас усе́рдный моли́твенниче, о́тче наш Пе́тре! К тебе́ смире́нно припа́даем и мо́лимся: простри́ ру́це твои́ ко Го́споду Бо́гу и помоли́ся за ны, гре́шныя и недосто́йныя рабы́ Его́: да проба́вит нам ми́лость Свою́ и низпосле́т нам вся благопотре́бная к вре́менному житию́ и ве́чному спасе́нию на́шему дары́ бла́гости Его́, наипа́че же да огради́т нас ми́ром, братолю́бием и благоче́стием от всех искуше́ний врага́ диа́вола, и да́рует нам бы́ти ве́рными ча́дами твои́ми, не по и́мени то́кмо, но и все́м житие́м на́шим. Ей, уго́дниче Бо́жий! Услы́ши нас благоутро́бно, и бу́ди всем нам помо́щник и засту́пник во вся́ких беда́х и напа́стех, не забу́ди нас и в час кончи́ны на́шея, егда́ наипа́че твоего́ заступле́ния потре́буем, да, при по́мощи моли́тв твои́х святы́х, сподо́бимся и мы, гре́шнии, кончи́ну благу́ю улучи́ти и Ца́рствие Небе́сное унасле́дити, сла́вяще ди́внаго во святы́х Свои́х Бо́га на́шего, Отца́ и Сы́на и Свята́го Ду́ха, во ве́ки веко́в. Ами́нь.
Прпп. Дамиа́на, пресвитера, целебника (1071), Иереми́и (ок. 1070) и Матфе́я (ок. 1085), прозорливых, Печерских, в Ближних пещерах
Тропарь, глас 1
Христо́вых повеле́ний све́том сердца́ своя́ просвети́вше,/ стра́стный мрак прогна́сте,/ те́мже Тро́ицы селе́ние бы́сте тричи́сленнии отцы́,/ Дамиа́не, Иереми́е с Матфе́ем,/ от Нея́же благода́ть прие́мше,/ неду́жныя исцеля́ете, бу́дущая возвеща́ете/ и, А́нгелом соприча́стницы су́ще,// моли́теся Христу́ Бо́гу дарова́ти нам прича́стие святы́х.
Кондак, глас 2
Я́коже дре́внии проро́цы благода́ть проро́чествия прие́мше/ и нело́жне ду́хом предзре́вше, прореко́ша наити́ хотя́щая,/ та́ко и вы в жи́зни на́шей зла́я, грехо́в ра́ди на́ших на ны гряду́щая, предвозвести́сте;/ и ны́не да не пости́гнут ны зла́я,// испроси́те от Христа́ Бо́га исправле́ние дело́м на́шим и ве́лию ми́лость.
Величание
Ублажа́ем вас, преподо́бнии отцы́ Дамиа́не и Иереми́е с Матфе́ем, и чтим святу́ю па́мять ва́шу, наста́вницы мона́хов и собесе́дницы а́нгелов.
прп. Харити́ны, кн. Литовской, в Новгороде подвизавшейся, игумении (1281)
Тропарь, глас 2
От ю́ности твоея́ Бо́га все́м се́рдцем возлюби́ла еси́, Харити́но преподо́бная, по́двиги в ве́ре положи́ла еси́ за Христа́, Жениха́ твоего́, и в но́вое твое́ Оте́чество, зе́млю ру́сскую вселилась еси́, к Небе́сному Оте́честву на́с призыва́еши, моля́щи Христа́ Бо́га спасти́ся душа́м на́шим.
Кондак, глас 4
Оте́чество твое́ и ро́д оста́вив, Вели́каго Нова́града дости́гла еси́, во оби́тели и́ноческой многотру́дный по́двиг преподо́бнический подъя́ла еси́, а́нгельски на земле́ пожи́вше, мно́гим жена́м русским пу́ть ко спасе́нию показа́. Те́мже вси́ притека́юще к тебе́, зове́м: ра́дуйся, преподо́бная ма́ти на́ша Харити́но.
Молитва
О, преподо́бная и пресла́вная ма́ти Харити́но, неве́сто Жениха́ твоего́ Христа́, предста́тельница и храни́тельница Вели́каго Нова́града и земли́ Ру́сской. Услы́ши ны́, моля́щиися к тебе́, и я́коже попече́ние име́ла еси́ о оби́тели твое́й и и́ночествующих в не́й и мно́жество же́н ру́сских на пу́ть спасе́ния направила еси́, та́ко и ны́не помози́ на́м, просвети́ омраче́ние умо́в на́ших и к све́ту и́стинныя ве́ры наста́ви наро́д росси́йский, наде́жду на Бо́га в душа́х на́ших укрепи́, любо́вь в сердца́х на́ших утверди́ и испроси́ на́м вре́мя на покая́ние.
Во дни́ вели́ких бе́д и скорбе́й страны́ на́шея бу́ди о на́с засту́пница, умоли́ Пречи́стую Ма́терь Го́спода, да спасе́т зе́млю ру́сскую от гла́да, от наше́ствия враго́в и междоусо́бныя бра́ни, от смертоно́сных я́зв и боле́зней, да укрепи́т ны́ в Правосла́вии, единомы́слии, братолю́бии и непоколеби́мем да́же до сме́рти испове́дании ве́ры Христо́вы, да научи́т ны́ послуша́нию Це́ркви Его́ Святе́й. О, приснопа́мятная ма́ти на́ша Харити́но, принеси́ за на́с гре́шных моли́твы твоя́ и разсе́янных ча́д Бо́жиих собери́ любо́вию твое́й, возжзи́ пла́мень моли́твы в сердца́х на́ших, да сла́вяще па́мять твою́, просла́вим Го́спода на́шего Иису́са Христа́ во ве́ки веко́в. Ами́нь.
Величание
Ублажа́ем тя́, преподо́бная ма́ти Харити́но, и чти́м святу́ю па́мять твою́, наста́внице и́нокиням и собесе́днице а́нгелом.
сщмч. Диони́сия, епископа Александрийского (264–265)
мц. Маме́лхвы Персидской (ок. 344)
прп. Григо́рия Хандзтийского, архимандрита (861) (Груз.)
Исп. Гаврии́ла (Игошкина), архимандрита Мелекесского (1959)
Тропарь, глас 3
Вельми́ све́тел яви́ся на́м по́двиг жития́ твоего́,/ испове́дниче Христо́в Гаврии́ле,/ любве́ ра́ди ко Го́споду изше́л еси́ с ра́достию на ско́рбь и лише́ния,/ кре́ст сво́й нося́й/ и та́ко о́браз терпе́ния показу́яй,/ ве́рныя в годи́ну озлобле́ния/ па́стырски в ве́ре соблю́л еси́,/ дерзнове́нием благода́ть Свята́го Ду́ха стяжа́в,/ те́мже у́бо вопие́м ти́:// моли́твами твои́ми спаси́ души́ на́ша.
Кондак, глас 2
Кре́пости Бо́жия соименник/ и прича́стник Бо́жия благода́ти яви́лся еси́,/ о́тче Гаврии́ле,/ преподо́бием и испове́дничеством/ и́стину Правосла́вныя ве́ры утвержда́яй,/ и́го Христо́во до конца́ восприя́л еси́,/ те́мже и просла́влен еси́ со святы́ми,// моли́ Христа́ Бо́га спасти́ся душа́м на́шим.
Молитва
О, до́брый па́стырю и до́блий во́ине Христо́в, ско́рый помощниче и те́плый засту́пниче, богоблаже́нный уго́дниче Бо́жий и Правосла́вия тве́рдый испове́дниче Гаврии́ле! Име́яй ве́лие дерзнове́ние пред Престо́лом Всевы́шняго, не оста́ви на́с моли́твами твои́ми, с любо́вию и ве́рою к тебе́ притека́ющих. Ты́ бо от ле́т ранних ю́ности твоея́ о́гнь любве́ Боже́ственныя в се́рдце твое́м ко Го́споду возже́гл еси́, жи́знь свою́ всеце́ло Бо́гу посвяти́вый, наипа́че нищету́ духо́вную стяжа́вый, я́ко ра́б благи́й, дела́ богоуго́дная кро́тко и смире́нно твори́л еси́, те́мже и надели тя́ Госпо́дь да́ры Ду́ха Свята́го, и́миже и поны́не то́чиши чудеса́ мно́гая. Мо́лим тя́, о́тче Гаврии́ле, при́зри на лю́ди, зде́ стоя́щия, и благода́тию, ти́ Свы́ше да́нною, уврачу́й души́ на́ша, грехо́м изъязвленныя, исцели́ телеса́ на́ша многоболе́зненная, ста́рость поддержи́, вдови́ц заступи́, си́рых и обездо́ленных окорми́, супру́жество ве́рно сохрани́. На́с же вразуми́, научи́ и воспита́й ча́да на́ша в ве́ре Правосла́вной, дабы́ не уклоня́тися на́м от пра́выя стези́, но, храня́ще апо́стольская преда́ния, тве́рдо Христа́ Бо́га испове́дати. Е́й, свя́тче Бо́жий! Умягчи́ се́рдца на́ша, жите́йскими попече́ньми окамене́нная, и помози́ на́м милосердными бы́ти, во е́же, до́лга христиа́нскаго не забыва́юще, еди́ному от ме́ньших бра́тий Го́спода на́шего Иису́са Христа́ ми́лостиво послужи́ти. Дабы́, егда́ яви́тися Го́сподеви на́шему во сла́ве Отца́ Своего́ со А́нгелы Святы́ми, в ра́дости услы́шати гла́с Его́: прииди́те, благослове́ннии Отца́ Моего́, насле́дуйте угото́ванное ва́м Ца́рствие от сложе́ния ми́ра. Ами́нь.
