Ошо көндәрҙә Өфөлә үтәсәк “Рәсәй – спорт иле” форумының төп майҙансығы - Көрәш һарайы. Форум сиктәрендә яңы ҙур объекттар – Өфөлә Фехтование үҙәген, Ишкәкле слалом комплексын һәм Нефтекамала «Амфибия» спорт үҙәген асыу планлаштырылған. Ишкәкле слалом каналы Рәсәй йыйылма командаһы ҡатнашлығында слалом буйынса тәүге «Ҡурай төбәге» халыҡ-ара ярыштарын ҡабул итә. Фехтование үҙәгендә йәш үҫмерҙәр араһында Халыҡ-ара “Салауат ҡылысы” турниры үтә. 17 октябрҙә “Өфө -Арена”ла “IBA чемпиондары төнө" профессиональ бокс кисәһе була - континент чемпионы титулы өсөн донъяның иң яҡшы боксерҙары көрәшә. Бәләкәй аренала йәш үҫмерҙәрараһында Бөтә Рәсәй керлинг буйынса ярыштар була. “Динамо” спорт комплексында “Динамо” һәм “ЦСП-Химки” клубтары араһында Рәсәй чемпионаты матчын, ә Спорт әҙерлеге үҙәгендә Рәсәй паралимпия комитетының МХО ветерандары өсөн сараларын күрергә мөмкин. 25 мең самаһы кеше Бөтә Рәсәй Йәйәүлеләр көнөндә ҡатнашырға теләген белдергән. Форум программаһында - түңәрәк өҫтәлдәр, пленар сессиялар, конференциялар, семинарҙар һәм дискуссия майҙансыҡтары. Рәсәй Президенты ҡарамағындағы Физик культураны һәм спортты үҫтереү буйынса советтың сираттағы кәңәшмәһе буласаҡ. Ул 17 октябрҙә Өфөлә форум менән бер үк ваҡытта үтә. Хәтерегеҙгә төшөрәбеҙ, “Рәсәй – спорт иле” форумы 2009 йылдан алып уҙғарыла. Уны Ҡазан, Мәскәү, Саранск, Якутск, Чебоксар, Доброград (Владимир өлкәһе), Ульяновск, Түбәнге Новгород, Кузбасс һәм Пермь ҡабул итте. Автор фотоһы.