Иртәгә “Чемпиондар төнө” була

17 – 19 октябрҙә Өфөлә XII “Рәсәй – спорт иле” халыҡ-ара спорт форумы барышында “Чемпиондар төнө” һөнәри бокс кисе үткәрелә. Форум “Спорт. Ғаилә. Рәсәй” девизы аҫтында үтә һәм был һөнәри тармаҡтағы иң ҙур аралашыу майҙансыҡтарының береһе була. Бокс кисе алдынан Башҡортостан Хөкүмәте Премьер-министры вазифаһын башҡарыусы, Башҡортостандың Бокс федерацияһы президенты Андрей Назаров медиа-үлсәү тантанаһында ҡатнашты. Ул сираттағы тапҡыр Башҡортостандың ҙур спорт сараларын үткәреү майҙансығына әүерелеүе тураһында әйтте. Һуңғы биш йылда Башҡортостанда халыҡ-ара кимәлдәге 50-нән ашыу тур ойошторолдо. – Быйыл Бокс халыҡ-ара ассоциацияһы ҡарары буйынса Башҡортостан өсөнсө тапҡыр мауыҡтырғыс турнир – "IBA чемпиондары төнө”н үткәреү урынына әйләнде. Был – башҡорт боксы мәктәбен сираттағы таныу. Республика өсөн был буласаҡ турнир айырыуса, икеләтә яуаплы. Иртәгә Башҡортостан “Рәсәй – спорт иле” масштаблы спорт сараһын үткәреү майҙансығына әүерелә. "IBA чемпиондары төнө” юғары кимәлдә үтер һәм боксты Башҡортостанда, Рәсәйҙә генә түгел, тотош донъяла популярлаштырыуға булышлыҡ итер тип ышанам, – тине Андрей Назаров сәләмләү һүҙендә. Әйткәндәй, Башҡортостанда дүрт меңдән ашыу кеше һөнәри рәүештә бокс менән шөғөлләнә. Республикала Рәсәй спорт мастерлығына 499 кандидат, Рәсәйҙең 23 спорт мастеры һәм Рәсәйҙең бокс буйынса халыҡ-ара класлы ике спорт мастеры бар. Өфөлә тағы WBA Asia ярыштарының ике билбауына алыштар үткәрелә. IBA версияһы буйынса Европа чемпионы билбауы хужаһы, Өфө егете Артур Собханғолов икенсе яртылаш еңел ауырлыҡта титул өсөн Ҡытайҙан Лиу Венсонг менән осраша. Башҡортостандан боксерҙар Азалия Әминева менән Данис Ғабдрафиҡовтың алышы көтөлә. Өс көн эсендә Башҡортостандың баш ҡалаһындағы һигеҙ майҙансығында 40-тан ашыу сара үткәрелә. Улар араһында спорт ярыштары, мәҙәни программа, эшлекле сессиялар, Рәсәй Президенты ҡарамағындағы Физик культура һәм спорт үҫеше буйынса совет кәңәшмәһе бар. Бынан тыш, форум майҙандарында тармаҡты яҡтыртҡан күргәҙмә ойошторола. “Баш ҡалала йәшәүселәрҙе һәм ҡунаҡтарҙы форум сараларын ҡарарға саҡырам. Бөтә Рәсәй һәм донъя кимәлендәге мауыҡтырғыс матчтар һәм турнирҙар була”, - тип яҙҙы социаль селтәрҙәге сәхифәһендә Андрей Назаров. Сығанаҡ, фото: pravitelstvorb.ru/news/25246/