Ҡараҡалпаҡстан менән хеҙмәттәшлек нығый

Бөгөн Өфөлә Башҡортостан Башлығы Радий Хәбиров Ҡараҡалпаҡстан Республикаһының юғары белем биреү, фән һәм инновациялар министры Батырбәк Ҡәйепбиргәнов менән осрашты. Көн тәртибендә - мәғариф өлкәһендә үҙ-ара эш итеү мәсьәләләре, шулай уҡ Үзбәкстанда Евразия ғилми-белем биреү үҙәге вәкиллеген асыу мәсьәләһе ҡаралды. Ике республика араһында берлектәге хеҙмәттәшлекте үҫтереү буйынса юл картаһы ғәмәлгә ашырыла, уны 2024 йылдың апрелендә Ташкентта үтәсәк «Иннопром. Үҙәк Азия» халыҡ-ара күргәҙмәһен асыу тантанаһында тәҡдим итәсәктәр. Һүҙ фәндә һәм мәғарифта башланғыстарҙы тормошҡа ашырыу хаҡында бара. - Үзбәкстандың иҡтисадын үҫтереүсе төп тармаҡтар өсөн белгестәр әҙерләү өлкәһендә хеҙмәттәшлек тәҡдим итәбеҙ. Был беҙҙе ҡыҙыҡһындыра, бының өсөн бөтә мөмкинлектәребеҙ ҙә бар, - тип һыҙыҡ өҫтөнә алды Радий Хәбиров. - Бөгөн Башҡортостандың юғары уҡыу йорттарында белем алыусы 11 меңгә яҡын сит ил студентының һәр унынсыһы - Үзбәкстандан. М. Аҡмулла исемендәге Башҡорт дәүләт педагогия университеты нигеҙендә бер йыл элек Үзбәк теле үҙәге асылғайны. Төбәктәр һөнәри әҙерлек өлкәһендә етди хеҙмәттәшлек итергә ниәтләй, тип билдәләне Ҡараҡалпаҡстандың Һөнәри белем биреү, фән һәм инновациялар министры. - Мин Башҡортостанда тәүге тапҡыр. Ихлас ҡабул иткәнегеҙ өсөн рәхмәт, - тине Батырбәк Ҡәйепбиргәнов үҙенең сығышында. - Беҙҙең ведомство яңы, ул 2024 йылда ғына булдырылды. Быға тиклем Ташкент мәғлүмәт технологиялары университетының Фирғәнә филиалы ректоры булып эшләнем. Республика етәкселеге беҙҙең алға һөнәри белем биреүҙе яңы кимәлгә сығарыу бурысын ҡуйҙы. Һәм бында беҙҙе тап колледждар системаһы, иретеп йәбештереүселәр, фрезерлаусылар һәм башҡа эшсе һөнәрҙәр әҙерләү ҡыҙыҡһындыра. Был йүнәлештә аныҡ аҙымдарыбыҙ бар - беҙгә Башҡортостандан урта махсус уҡыу йорттары директорҙары килде, ҡайһы бер проекттарҙы тикшерҙе. Ә был көндәрҙә беҙҙең делегация һеҙҙең уҡыу йорттарында ла эшләй. Осрашыуҙа шулай уҡ Евразия халыҡ-ара ғилми-белем биреү үҙәге вәкиллеген асыу тураһында фекер алыштылар. Был фәнни-технологик үҫештең өҫтөнлөклө йүнәлештәре буйынса уртаҡ тикшеренеүҙәр, тәжрибә-конструкторлыҡ эштәре алып барырға мөмкинлек бирәсәк. Ә Караганданың юғары уҡыу йорттары уҡытыусылары ғилми-белем биреү үҙәге филиалында квалификацияһын күтәрә ала. Радий Хәбиров ҡунаҡтарға Башҡортостанда Евразия күсмә цивилизациялар музейын төҙөү тураһында ла һөйләне. - Был музей һеҙҙең менән беҙҙең хаҡта. Беҙ ҙә, һеҙ ҙә - күсмә халыҡ. Турахандың боронғо кәшәнәһе эргәһендә, визит үҙәге эшләй ҙә инде. Музейҙы киләһе йылда төҙөй башлайбыҙ, уны ғилми яҡтан тулыландырабыҙ, - тип һыҙыҡ өҫтөнә алды Радий Хәбиров. - Беҙгә Игорь Савицкий исемендәге дәүләт сәнғәт музейы менән хеҙмәттәшлек итеү ҡыҙыҡлы булыр ине. Экспозициялар менән алмаша алыр инек. Был ошо өлкәлә тәүге эш итеү нөктәһе буласаҡ. Ә Евразия ғилми-белем биреү үҙәге вәкиллеге ошо йүнәлеш өсөн яуап бирә. Журналистар менән аралашҡанда Батырбәк Ҡәйепбиргәнов Башҡортостанда алған тәьҫораттары менән уртаҡлашты. - Беҙ «Фән һәм индустрия. Стратегия-2030» халыҡ-ара форумы эшендә ҡатнаштыҡ. Шулай уҡ Өфө дәүләт нефть техник университетында һәм Өфө фән һәм техника университетында булдыҡ. Хеҙмәттәшлек, студенттар менән алмашыу мәсьәләләрен тикшерҙек. Башҡортостан колледждарында ла булдыҡ, уларҙың делегациялары яңыраҡ тәжрибә уртаҡлашыу өсөн Карагандаға килде. Хеҙмәттәшлек буйынса пландарыбыҙҙы аныҡ ғәмәлдәр менән тулыландырыуыбыҙ мөһим. Башҡортостандың ғилми учреждениеларында тормошҡа ашырылған инновациялы проекттар менән дә таныштыҡ. Улар - телемедицина, генетика, мәғлүмәт технологиялары һәм башҡа йүнәлештәр. Ошо йүнәлештә һеҙҙең республика менән үҙ-ара эш итергә планлаштырабыҙ. Башҡортостан Башлығы менән осрашыуҙа тәү сиратта ниндәй йүнәлештәрҙе үҫтерергә кәрәклеге тикшерелде. Һүҙ берлектәге ғилми проекттар, педагогик тәжрибә уртаҡлашыу, колледж уҡытыусылары өсөн квалификация күтәреү курстарын үткәреү хаҡында бара, - тине ул. Фото Башҡортостан Башлығы сайтынан алынды.