Күренекле яҙыусыбыҙ – Салауат Юлаев ордены кавалеры

Республика көнө алдынан Башҡортостан етәксеһе Радий Хәбиров төрлө һөнәр эйәләре булған бер төркөм замандаштарға Башҡртостандың һәм Рәсәйҙең дәүләт наградаларын тапшырҙы. Бүләкләнеүселәр араһында билдәле яҙыусы Гөлсирә Мирза ҡыҙы Ғиззәтуллина ла бар ине. Әҙәби ижад даирәһенән халыҡтың иң ҡыҙыҡһынып, яратып уҡыған яҙыу оҫталарының береһенә Салауат Юлаев ордены тапшырылды. Әлбиттә, матур хәбәрҙе ишетеү менән, яҙыусыға бәйләнешкә сыҡтыҡ. Ҡыҙғанысҡа ҡаршы, көнөндә генә уның менән һөйләшергә, ҡотларға яҙманы. Белеүебеҙсә, әҙибә үҙенең тыуған төйәгендә – Ейәнсура районының Иҙәш ауылында йәшәп ижад итә. Бына бөгөн, ниһайәт, Гөлсирә Мирза ҡыҙы үҙенең награда алырға барғанда тыуған кисерештәре менән уртаҡлашты. – Дәүләт наградалары алыусылар араһында ысын хеҙмәт эйәләре, хеҙмәт батырҙары, яу батырҙары булды. Уларҙың йөҙҙәре, хатта ҡулдарына тиклем ил ғәме тип яныуҙары тураһында һөйләй ине. Яуҙан ҡайтҡан ир-аттар һәм Донбассҡа, Донецк өлкәһенә барып, яралыларҙы тәрбиәләгән, аяҡҡа баҫтырған табиптар... Улар менән бер залда ултырыу, бүләкләнеү шул ҡәҙәре тулҡынландырғыс булды. Илебеҙҙең әлеге ауыр ваҡытында шундай ышаныслы кешеләрҙең булғаны, шул кимәлдә етди ҡарағаны күңелемә ныҡ тәьҫир итте, башыма: "Үҙемдең ҡулдан килгәндең бөтәһен дә эшләйемме һуң, ошондай һынау осоронда Тыуған илемә нисек ярҙам итә алам?" – тигән һорауҙар инеп ояланы. Тағы ла тырышыбыраҡ ижад итергә, берләшергә, бергә булырға һәм еңеүҙе яҡынайтырға, тигән уй нығыраҡ көсәйҙе. Ни тиһәң дә, үҙебеҙ тыныс мөхиттә йәшәгәс, ил өҫтөнә килгән афәтте тулыһынса аңлап етмәйбеҙ төҫлө, ә шуның араһында йөрөгән кешеләрҙе күреү тәрән уйҙарға һалды. Илебеҙ халҡына, еңеүҙе яҡынайтыр өсөн, бер төптән булырға кәрәк, сөнки дошман инде Ватаныбыҙ биләмәһендә, ике уйлап, илке-һалҡы йөрөй торған мәл түгел! Награда алыу ниндәйҙер күтәренке рухтағы тантана кеүек булһа ла, беҙ үҙебеҙҙең хәлде дөрөҫ аңларға тейешбеҙ – ошондай уйҙар менән ҡайттым Өфөнән. Награданы иһә үҙемә ныҡ ярҙам иткән, Салауат Юлаев исемендәге премияға үтеүемде теләп, ҡултамғалар йыйған уҡыусыларымдың, дуҫтарымдың, ижадташтарымдың берҙәмлеге арҡылы алынған бүләк, тип ҡабул итәм һәм барыһына ла йөрәгемдән сыҡҡан рәхмәт һүҙҙәрен әйтәм, – тине хөрмәтле яҙыусыбыҙ. Гөлсирә Мирза ҡыҙын абруйлы награда алыуы менән ихлас ҡотлайбыҙ һәм ныҡлы һаулыҡ, ижад ҡомары ташламауын теләйбеҙ! Рәүилә Ғатауллина. Фотолар Башҡортостан Башлығы сайтынан, бүләкләү тантанаһынан һәм яҙыусының шәхси архивынан алынды.