Башҡорт халҡының тантана итеүе

Республика көнөн быйыл айырыуса көтөп алды халыҡ. Сөнки күптән түгел генә барлыҡҡа килеп, яңы йәшәй башлаған, республикабыҙҙың Дәүләт ҡурайсылар ансамбле тамашасыларға үҙенең тәүге концерт-презентацияһын тәҡдим итте. Бында барыһы ла уйланған, ентекле әҙерләнгән: ҡыҫҡа ғына ваҡыт эсендә сәхнә кейемдәре тегелгән, инструменттар һатып алынған, ансамбль тарафынан башҡорт халыҡ көйҙәре лә, авторлыҡ көйҙәр ҙә эшкәртелеп ҙур сәхнәгә сығырлыҡ кимәлгә еткерелгән. Һәм кисәге көн ҡурайсылар өсөн генә түгел, башҡорт халҡы өсөн дә иҫтәлекле көн булды: тамаша башланғанда Башҡортостан Республикаһы Башлығы Радий Хәбиров 10 октябрҙе Ҡурай көнө итеп иғлан итте. Ул йыл һайын республика буйлап төрлө саралар менән киң билдәләнәсәк. Был шатлыҡлы яңылыҡты тамашасылар аяҡ үрә баҫып дәүррәү ҡул сабыуҙар менән ҡабул итте. – Беҙ ҡурайҙың ябай музыка ҡоралы ғына түгел икәнен аңлайбыҙ, ул күптән был сиктәрҙе үтеп киткән. Ҡурай – башҡорт милләтенең музыкаль символы, быуындарҙы берләштергән мөһим элемент, башҡорт халҡының әләме, ораны, ҡеүәте, башҡорт халҡының йәне, – тип билдәләне Радий Хәбиров. – Дәүләт ансамбле иң көслө музыканттарҙы йыйыу нөктәһе буласаҡ, тип ышанабыҙ. Ошоноң менән яңы сағыу быуын башҡарыусылар барлыҡҡа киләсәк һәм беҙ ҡурайҙы һаҡлап ҡаласаҡбыҙ. Һүҙенең аҙағында Радий Фәрит улы ансамблгә байрам уңайынан автобус бүләк итте. Ғөмүмән, ҡурай байрамына, халҡыбыҙҙың боронғо милли уйын ҡоралына тейешле, лайыҡлы ҡарашты барыһы ла күптән көткәне аңлашылды. Шулай итеп, кисәге, Дәүләт ҡурайсылар ансамбленең тыуған көнө, ысын мәғәнәһендә күңел байрамы, рух байрамы булды. Концерт, “Урал” башҡорт халыҡ йырынан башланды. Халҡыбыҙҙың яҙылмаған ҡануны буйынса гимнға әйләнгән был көйҙө бөтә зал хөрмәт менән баҫып тыңланы, ә тамаша ҡылырға килгән ҡурайсылар ҡурайҙарын сығарып залдан тороп ҡушылды. Был тик беҙҙең халыҡҡа ғына хас бөйөк ғәмәл! Күптәрҙең күҙҙәрендә йәштәр күренде, был шатлыҡ, ғорурлыҡ йәштәре ине, әлбиттә. Артабан тамашасыларҙы ысын шоу көтә ине. Сәхнәлә төрлө дәүерҙәрҙең легендар ҡурайсылары: милли геройыбыҙ Салауат Юлаевтан башлап, Йомабай Иҫәнбаев, Ишмулла Дилмөхәмәтов, Ғата Сөләймәнов, Әҙеһәм Исҡужин кеүек шәхестәребеҙҙең фатиха һүҙҙәре яңғыраны. Ә иһә концерт программаһында башҡорт халыҡ көйҙәре, йырҙар һәм бейеүҙәр башҡарылды. Ансамблгә нигеҙ һалыусы, уның етәксеһе Азат Айытҡоловтың әйтеүенсә, тамашасыны ниндәйҙер яңылыҡ менән хайран ҡалдырыу улар өсөн икенсе урында, бөгөн тап беренсе урында ансамблдең яҡшы, сифатлы итеп уйнауы тора. Шуға ла, ансамблгә кастинг ваҡытында 250-гә яҡын музыканттан тик 20 генә ҡурайсы һайлап алынған. Эйе, ҡасандыр сит илдәрҙе таң ҡалдырған ҡурайыбыҙ бөгөн дә, хөкүмәтебеҙҙән булған ыңғай ҡараш, халыҡ һөйөүе менән яңы бейеклектәрҙе яулай. Юлы аҡ булһын! Фотолар: “Башинформ”дан.