Бөгөн билдәле эшҡыуар һәм шағир Азамат Юлдашбаев үҙенең күркәм юбилейын билдәләй. Ошо уңайҙан юбилярҙы ҡотлап, уға иң изге теләктәрҙе еткерәбеҙ. Азамат Рәмил улын 60 йәше менән тәбрикләп, шағирә Гөлназ Ҡотоеваның күңел түренән сыҡҡан иң матур теләктәрен һеҙгә лә еткергебеҙ килә. "2002 йылдар тирәһендә таныштым мин уның менән. “Ағиҙел” журналы редакцияһында эшләп ултырғанда, ҡарасман ғына һылыу егет килеп инде лә туп-тура миңә атлап килеп ҡулыма ҡағыҙ һондо. Баҙап ҡалдым. “Завод, фабрикалар – эшселәргә, Бабич премияһы – шағирҙарға!” тигән баш аҫтында Гөлназ Ҡотоеваға ниңә Бабич премияһы бирелмәне тигән фекерен еңеллек һәм үҙенә күрә сая рух менән теҙгәйне ул унда. Ысынлап, “Һағынырмын ямғыр елен” китабым менән “Шоңҡар” журналы йәштәр премияһына тәҡдим иткәйне һәм һөҙөмтәләре билдәле булғайны. Ҡыйралыбыраҡ йөрөгән миңә был тереһыу кеүек тәьҫир итте. Тағы ла яҡшыраҡ китап яҙасаҡмын, тигән фекергә килдем был хәлдән һуң Мәҡәлә “Йәшлек” гәзитендә донъя күрҙе, ә Азамат Рәмил улы һуҙған ҡағыҙ минең архивымда, хәтеремдә әле лә һаҡлана. Ул райондан килеп “Йәшлек”кә эшкә төшкән ваҡыты ине. “Йыл уҡытыусыһы” титулын алған, тауышы гөрһөлдәп яңғырап торған ир арыҫланы әҙәбиәтебеҙ майҙанына ла бик тәүәккәл аяҡ баҫты. Баш ҡалаға ерегеп китеүе еңел булмаһа ла, ул эш менән булды. Әҙәби-мәҙәни сараларҙың уртаһында ҡайнаны. Башҡортостан Яҙыусылар союзында рәйес урынбаҫары булып эшләне. Тап шул дәүерҙә мин Бабич премияһын алдым. Ул үҙе комиссияла булды һәм минең ижадымды яҡлап сығыш яһаны. Иң тәүҙә һөйөнсөләүсе лә ул булды. Унан ошо хаҡта смс алғас, күҙемдән йәштәр бәреп сыҡҡайны. Мәртәбәле бүләкте тапшырғанда ла Азамат Юлдашбаев менән һабаҡташым Гөлназ Ҡолһаринаның сығышы иң сағыу сығыш булып хәтеремә уйылған. Азамат Юлдашбаев сәпкә тыҡ итеп килеп тейгән, фәлсәфәүи, тапҡыр шиғырҙар ижад итеүенән тыш иҫ киткес нескә психологик хикәйәләр яҙыусы ла ул. “Башҡортостан ҡыҙы”нда уның тап шундай хикәйәләре донъя күрҙе.Азамат Рәмил улы “Шоңҡар”, “Ватандаш” журналдарында һәм “Башҡортостан” гәзитендә баш мөхәррир булып эшләне. Уның бер ваҡытта ла ҡырын һүҙ түгел, ҡырын ҡараш атҡанын тойманым. Һәр ваҡыт иңен ҡуйыр, йөпләр, үҙ һүҙен әйтеп, йәнде иретерлек итеп йылмайып ҡуйыуы ғына иҫтә.Эшҡыуар булып киткәс, ниңә килмәйһең, һорамайһың, әйҙә биш кешегә “Башҡортостан ҡыҙы”н бүләк итеп яҙҙырам тип, аҡсаһын да шунда уҡ күсереп ҡуйҙы. Бына шундай ысын рыцарь, батыр, ҡаһарман ул Азамат Юлдашбаев. Бөгөн 1964 йылдың 10 октябрендә Ейәнсура районы Саҙалы ауылында тыуған шағир, журналист һәм эшҡыуар Азамат Юлдашбаев 60 йәшлек юбилейын билдәләй. Уны һәр ваҡыт йәш, сәмле итеп күреп өйрәнгәнгә был дөрөҫ тә түгел һымаҡ. Икенсе яҡтан ҡарағанда, 60 нимә инде ул. Самый ең һыҙғанып эшләр сағы ғына. Минең Йыһанымда уның йондоҙо сағыу балҡый. Үҙе кеүек ҡыҫҡа ғына итеп, уға бәхет, һаулыҡ һәм оҙон ғүмер теләйем! Шулай уҡ матур-матур әҫәрҙәр көтөп ҡалам. Һағындырҙы! Давай, ижад ит әле, көтөп-көтөк булдыҡ бит. Ижади майҙан һине көтә, уҡыусыларың көтә. Юбилейың менән, ҡәләмдәш!"- тип яҙған Гөлназ Ҡотоева. Юбилейығыҙ менән, Азамат Рәмил улы! Фото һәм текст сығанағы: Гөлназ Ҡотоеваның "Бәйләнештә"ге сәхифәһенән