Илдең именлеген хәстәрләне

Бөгөн, 10 октябрҙә медицина фәндәре докторы, профессор, Башҡортостандың һәм Рәсәйҙең атҡаҙанған фән эшмәкәре, СССР-ҙың уйлап табыусыһы Зәйнулла Ғәбиҙуллин йәшәгән йортта мемориаль таҡтаташ асылды. Ул баш ҡаланың Баҡалы урамы, 68/6-сы йорт адресы буйынса урынлашҡан. Сарала республиканың күренекле дәүләт, йәмәғәт эшмәкәрҙәре, медицина берләшмәһе вәкилдәре ҡатнашты. Бөтә донъя башҡорттары ҡоролтайы Президиумы рәйесе, РФ Дәүләт Думаһы депутаты Эльвира Айытҡолова, сараны асып, түбәндәгеләрҙе билдәләне: - Башҡортостанда күренекле шәхестәр күп, һәм беҙ - улар хаҡында иҫтәлекте хөрмәт итә белгән халыҡ. Һуңғы биш йылда Бөтә донъя башҡорттары ҡоролтайы күренекле ватандаштарыбыҙҙың хәтерен мәңгеләштереү буйынса илленән ашыу сараны тормошҡа ашырҙы: һәйкәлдәр, мемориаль таҡтаташтар асылды, мәғариф учреждениеларына исемдәр бирелде һ.б. Был сараларҙың ике тиҫтәнән ашыуы республикабыҙҙан ситтә тормошҡа ашырылды. Мин, Рәсәй Дәүләт Думаһының мәғариф буйынса комитеты ағзаһы булараҡ, Зәйнулла Ғәйнулла улы Ғәбиҙуллиндың күп асыштар яһаған ҙур ғалим-практик һәм уйлап табыусы ғына түгел, ә оло йөрәкле педагог, остаз да булыуын әйтә алам, ул бөгөнгө медицинала уның башлаған эштәрен дауам иткән ғалимдарҙың сағыу плеядаһын әҙерләгән. Бөгөн, санкциялар менән бәйле ҡатмарлы сәйәси һәм социаль-иҡтисади осорҙа, беҙҙең өсөн тикшеренеүҙәрҙә, асыштарҙа һәм, әлбиттә, микробиологияла үҙаллы булыу бик мөһим. Был - мөһим йүнәлеш, беҙ, төрлө хәүефтәргә ҡаршы торған ил булараҡ, уны артабан үҫтерергә тейешбеҙ. Зәйнулла Ғәйнулла улын һәр саҡ ҙур хөрмәт менән иҫкә аласаҡбыҙ. Ул үҙе тураһында иҫтәлек йәшәһен өсөн барыһын да эшләгән. Башҡорт дәүләт медицина университеты артабан да кешеләрҙе көн һайын ҡотҡарыусы кадрҙар әҙерләү сығанағы, федераль, донъя кимәлендәге Рәсәй ғилми берләшмәһе нигеҙе булһын өсөн күп көс һалған. БДМУ ректоры, Рәсәй фәндәр академияһы академигы, медицина фәндәре докторы, профессор Валентин Павлов Зәйнулла Ғәйнулла улының университетыбыҙ үҫешенә ҙур өлөш индергәнен билдәләне: – Зәйнулла Ғәбиҙуллин – республика, ил патриоты, башҡорт халҡының күренекле вәкиле, Бөтә Рәсәйҙә, донъяла билдәле ғалим, республика микробиология мәктәбен булдырған һәм был эште дауам иткән шәхес. Ул ғәжәйеп яҡты кеше ине. Ихлас, ярҙамсыл. Шул уҡ ваҡытта талапсан да. Үҙенең кафедраһын ғына түгел, ә микробиологияның тотош системаһын булдырған белгес. Һөҙөмтәлә оҙаҡ йылдар беҙҙең университет Һаулыҡ һаҡлау министрлығы системаһында фәнни фундаменталь микробиологияға эйә булған берҙән-бер университет булды. Ул һәр саҡ илдең именлеге, яңы инфекцияларҙан заманса яҡлау булдырыу кәрәклеге тураһында һөйләне. Беҙҙең йөрәктәрҙә Зәйнулла Ғәйнулла улы һәр ваҡыт тере буласаҡ. Уның башланғыстарын, фәнни йүнәлештәрен уҡыусылары дауам итә. Бөтә донъя башҡорттары ҡоролтайы Башҡарма комитеты ағзаһы, Башҡорт дәүләт медицина университетының микробиология, вирусология кафедраһы мөдире, медицина фәндәре докторы, профессор Марсель Тойғонов, сараны ойоштороусы булараҡ, бөгөнгө ваҡиғаның тәрбиәүи характерҙа булыуын да һыҙыҡ өҫтөнә алды, сөнки ошо йорт янынан үткән кешеләр бында күренекле кешенең йәшәгәнен беләсәк һәм мотлаҡ уйланасаҡ: - Һәр ғалим үҙенең вариҫтарын әҙерләй. Әгәр Зәйнулла Ғәйнулла улы булмаһа, мин бөгөн фән кандидаты ла, докторы ла булмаҫ инем. Уның юлын дауам итәм, университетта микробиология кафедраһы мөдире булып эшләйем һәм минең өсөн, беренсе сиратта, ошо ғәмәлдәр - уҡытыусым тураһындағы хөрмәт һәм хәтер. Был сараны ойоштороуыбыҙға бик шатмын. Беҙҙең кафедрала уның тураһында, ул республика өсөн әҙерләгән фән докторҙары тураһында айырым стенд бар. Исемлектә – ете доктор, 25-тән ашыу медицина фәндәре кандидаты. Ғалимдың исемен мәңгеләштереү маҡсатында йыл һайын БДМУ-ның дауалау-педиатрия факультеты студенттары араһында олимпиада үткәрәбеҙ, - тине Марсель Марат улы. Ғалим З. Ғәбиҙуллин етәкселегендә башҡарылған күп һанлы ғилми тикшеренеүҙәр генетик һәм молекуляр кимәлдәге микробиологтарҙың яңы фәнни мәктәбенә нигеҙ һалған. Уның ҡатнашлығында кафедрала республика халҡына диагностика хеҙмәттәре күрһәтеү буйынса «Диагностика лабораторияһы» асылған. 3әйнулла Ғәбиҙуллин етәкселегендә ете докторлыҡ һәм 25 кандидатлыҡ диссертацияһы яҡланған, 320-гә яҡын ғилми эш баҫылған, улар араһында 40-ҡа яҡын авторлыҡ танытмаһы һәм уйлап табыуға патент, 20 методик тәҡдим һәм бихисап уҡыу әсбаптары бар. Фото: Бөтә донъя башҡорттары ҡоролтайы.