Баш ҡала халҡы һәм ҡунаҡтары өсөн Өфөлә яңы үҙенсәлекле объект – Ағиҙел яры буйында Дуҫлыҡ монументы эргәһендә колоннада асылды. Абхазияның Сухум ҡалаһындағы билдәле архитектура ҡоролмаһының күсермәһе хәҙер баш ҡалабыҙҙы ла биҙәйәсәк. Был тантаналы сарала Башҡортостан Башлығы Радий Хәбиров, Абхазия Президенты Аслан Бжания, һәм Донецк Халыҡ Республикаһы Башлығы Денис Пушилин ҡатнашты. Әйтергә кәрәк, колоннада нигеҙенә тәүге таш былтыр 11 октябрҙә һалынғайны. – Республика көнө алдынан бөгөн беҙҙә сағыу ваҡиға. Ул беҙҙең ҙур дуҫлығыбыҙҙың символы булып тора. Был урын Башҡортостан, Өфө халҡы өсөн бик мөһим. Тап ошонан 1574 йылда беҙҙең баш ҡалабыҙ Өфө башлана. Эргәлә генә башҡорттарҙың Рәсәй дәүләте составына ирекле ҡушылыуының 400 йыллығына арналған Дуҫлыҡ монументы тора. Бер яҡта - Өфөгә Хеҙмәт ҡаһарманлығы ҡалаһы исеме бирелеүгә арналған обелиск. Беҙ тап ошонда 1948 йылда Сухум ҡалаһында төҙөлгән колоннада күсермәһен булдырырға ҡарар иттек. Башҡортостан менән Абхазия дуҫлығының тамырҙары тәрәндә. Үткән быуаттың ауыр 20-се йылдарында Волга буйында аслыҡ мәлендә тап Абхазия аҙыҡ-түлек менән ярҙам итте. Абхазияның азатлыҡ өсөн көрәше башланғас, Башҡортостан тәүге булып 1994 йылда унда вәкиллеген асты. Беҙҙең халыҡ Абхазияға ярҙам күрһәтте, аҙыҡ-түлек, яғыулыҡ-майлау материалдары оҙаттыҡ. Былар береһе лә онотолмай. Бөгөн беҙ Абхазияның үҫеш, бойондороҡһоҙлоҡ юлында булыуын ҙур хөрмәт, тулҡынаныу менән ҡарайбыҙ. Уның үҫеүе, күркәм төбәккә әүерелеүе өсөн шатланабыҙ. Абхазия менән Рәсәй Федерацияһының 60-тан ашыу төбәге хеҙмәттәшлек итә. Беҙҙең өсөн дә ул ҡәҙерле төбәк. Был колоннада дуҫлыҡ символына әүерелһен, кешеләр бында ғаиләләре, балалары менән килһендәр, – тине Радий Хәбиров. Абхазия Президенты Аслан Бжания Республика көнөнә арналған байрам сараларының тап колоннада асылыуынан башланыуына һөйөнөсөн белдерҙе: – Быны беҙ Башҡортостан менән Абхазия араһындағы үҙенсәлекле мөнәсәбәт билдәһе итеп ҡабул итәбеҙ. Беҙҙең халыҡтар араһында дуҫлыҡты сағылдырған был объекттың Дуҫлыҡ монументы эргәһендә урынлашыуы ла ҙур мәғәнәгә эйә. Был архитектура ҡоролмаһы халыҡтың яратҡан ял урындарының береһенә әүерелер тип ышанам, - тине Абхазия президенты. Өфөлә Ағиҙел яры буйындағы колоннада - Сухумда Ҡара диңгеҙ ярында төҙөлгән ҡоролманың күсермәһе. 22 колоннанан торған был колоннаданың бейеклеге 12 метрға, оҙонлоғо 30 метрға етә, киңлеге алты метр тирәһе. Тәбиғи таштар менән йөҙләнгән был архитектура ҡоролмаһы ҡаланың үҙенсәлекле урынына әүерелер. Һәр яҡлап ныҡлы итеп эшләнгән ҡоролма быуаттар буйына ла бирешмәй ҡаланы йәмләп торор. Фото:"Башинформ" мәғлүмәт агентлығы.