Тайнаштар еңеү өсөн тырыша

Саҡмағош районының Тайнаш, Әхмәт, Ҡаран, Иҫке Балаҡ, Һары Айғыр ауылдарын берләштергән был биләмәлә йәшәүселәр махсус хәрби операциялағы һалдаттарҙы иғтибарһыҙ ҡалдырмай. Ошо маҡсатта ирекмәндәр штабы ла булдырылған. Тәүге йылда күбеһенсә аҙыҡ-түлек менән ярҙам итһәләр, һуңынан яугирҙәргә кәрәкле әйберҙәр тупларға тырышалар. Тайнаш ауыл биләмәһе башлығы Хәлил Исхаҡов әйтеүенсә, былтыр ғына махсус хәрби операциялағы егеттәргә ярҙамға 140 мең һумлыҡ әйбер оҙатылған. Улар араһында тепловизор, һыуытҡыс, төрлө кәрәк-яраҡ, аҙыҡ-түлек бар. Халыҡ аҡсалата ла, продукция менән дә үҙенең ярҙам өлөшөн индерергә тырыша. Тайнаш ауылынан Рәхимовтар ғаиләһе хатта 30 килограмм бал килтергән. Быйыл халыҡтың ярҙамы тағы тосораҡ. Был юлы халыҡ яугирҙәргә әйберҙәр алыу өсөн 150 мең һум аҡса йыйған. Һәр кем ҡулынан килгәнсә үҙенең өлөшөн кереткән. УАЗ машинаһы өсөн тәгәрмәстәр, төрлө запчастәр, блиндаж эшләргә төҙөлөш материалдары, бәләкәй һыуытҡыс алғандар. Саҡмағошта маскировка селтәре үреүселәргә материалдар алып та изгелекте арттырғандар. Ябай кешеләр генә түгел, хужалыҡтарҙың да ярҙамы ҙур. Мәҫәлән, “Герой” ауыл-производство кооперативы-колхозы һалдаттарға ит ебәргән. Әле окоп шәмдәре эшләй башлағандар. Уға һорау булыу менән яу урынына оҙатыласаҡтар. Быны башҡарыуҙа айырыуса ауыл хакимиәте, клуб, китапхана хеҙмәткәрҙәре тырыша. Гуманитар ярҙам буйынса эште ойоштороуҙа ауыл биләмәһе белгесе Ләлә Шәймәрҙәнова ҙур эш башҡара. – Бындай ярҙам һәр яугир өсөн мөһим. Ауыр хәрби бурыстарҙы үтәгәндә тылдың ныҡ булыуы бик мөһим. Ундағы егеттәр үҙҙәрен өйҙәрендә көтөүҙәрен, улар тураһында хәстәрлек күреүҙәрен тойорға тейеш. Шул тиклем халыҡ ихлас ярҙам итә. Хатта ситтә йәшәгән ауылдаштарыбыҙ ҙа ҡушыла. Барыһының да теләге бер – еңеүҙе яҡынайтыу, – ти ауыл биләмәһе башлығы Хәлил Рәйес улы. Ошо ауыл биләмәһенән бөгөн 20-гә яҡын яугир махсус хәрби операцияла хеҙмәт итә. Улар араһында “Батырлыҡ өсөн”, “Хәрби отличие өсөн” миҙалдары менән наградланыусылар бар. Һалдаттарҙың яҡындары өсөн дә был осор ҙур һынау. Улар тураһында ла яҡташтары хәстәрлек күрә. Байрамдарға саҡырып хөрмәт күрһәтеү ҙә матур йолаға әүерелгән. Яңыраҡ Ҡаран ауылында яугирҙәрҙең әсәйҙәре менән бик йылы осрашыу үткән. Ғөмүмән, был төбәктә илһөйәрлек һәр ерҙә тойола. Улар үҙҙәренең батырҙарын да онотмай. Бер нисә йыл элек Бөйөк Ватан һуғышы яугирҙәренә яңы обелиск ҡуйғандар, яуҙа ҡатнашҡан 650 һалдаттың исем-шәрифтәре уйып яҙылған. Иҫке Балаҡ ауылынан Советтар Союзы Геройы Вәхит Ғәлимовҡа бюст ҡуйылған. Балалар менән патриотик саралар ҙа был изге урында даими уҙғарылып тора. Автор фотоһы.