8 октябрҙә Өфөлә Башҡортостан Башлығы Радий Хәбиров Шота Руставели урамындағы 37-се һәм 37/1-се күп фатирлы йорттарҙың ихата биләмәһендә булды. Төбәк етәксеһе «Башҡорт ихаталары» республика программаһы сиктәрендә йәмәғәт киңлеген комплекслы төҙөкләндереү менән танышты. Ихата биләмәһен яңыртыуға 16 миллион һум самаһы аҡса йүнәлтелгән. Был аҡсаға юлдар, тротуарҙар һәм йәйәүлеләр юлдары ремонтланған, йомшаҡ япмалы балалар майҙансығы ҡуйылған. Бынан тыш, ихатала автомобиль туҡталҡаһы киңәйтелгән, урам яҡтыртыуҙары яңыртылған, видеокүҙәтеү камералары ҡуйылған һәм йәшелләндерелгән. Башҡортостан Башлығы йортта йәшәүселәр менән аралашты, улар Радий Хәбировҡа ихата биләмәһен яңыртҡаны өсөн рәхмәт белдерҙе. Шота Руставели урамындағы 37-се йортта йәшәүселәр шулай уҡ республика етәксеһенән ҡыйыҡты капиталь ремонтлау мәсьәләһендә ярҙам итеүен һораны. Төбәк Башлығы төбәк операторына 2025 йылға капиталь ремонт планлаштырырға ҡушты. - Әгәр өйҙә ҡыйыҡ ағып торһа, подъезда ниндәй матурлыҡ йәки фатирҙа уңайлылыҡ тураһында һүҙ алып барырға мөмкин. Беҙ өсөнсө йыл инде ҡыйыҡтарҙы ремонтлауға республика бюджетынан аҡса бүләбеҙ. Быйыл сумма 450 миллион һумдан ашыу тәшкил итте, - тине Радий Хәбиров. Аралашыу ваҡытында халыҡ шулай уҡ Непейцев дендропаркын төҙөкләндереү мәсьәләһен күтәрҙе. Был 23,8 гектар майҙанлы тәбиғәт ҡомартҡыһы, Шота Руставели, Адмирал Макаров урамдары һәм Өфө шоссеһы араһында урынлашҡан. Радий Хәбиров халыҡҡа төҙөкләндереү буйынса тәҡдимдәрен Өфө хакимиәтенә ебәрергә тәҡдим итте. Билдәләп үтәйек, 2024 йылда республиканың баш ҡалаһында 33 күп фатирлы йорт урынлашҡан 10 ихата биләмәһе төҙөкләндерелде. Был маҡсатҡа 237 миллион һум йүнәлтелгән. Республика Башлығы «Башҡорт ихаталары»программаһының көнүҙәк булыуын һыҙыҡ өҫтөнә алды. - Халыҡ был проекты ыңғай баһалай, дәүләт уларға ярҙам итеүен күрә. Иң мөһиме, төҙөкләндереүҙә беҙ һәр ваҡыт тыныс атмосфера мөһим булған оло йәштәгеләрҙең, физик әүҙемлек талап иткән балаларҙың һәм ихаталарҙың транспортта йөрөү мөмкинлеген баһалаған автоһәүәҫкәрҙәрҙең һорауҙары араһында баланс табырға тырышабыҙ, – тине Радий Хәбиров. - Баланс табыу мөмкин булған ерҙә бик яҡшы арауыҡтар барлыҡҡа килә. Мәғлүм булыуынса, «Башҡорт ихаталары» республика программаһы 2019 йылдан Башҡортостан Башлығы Радий Хәбиров башланғысы менән тормошҡа ашырыла. Һөҙөмтәлә биш йыл эсендә төбәктә 6,2 миллиард һумға 1 326 ихата яңыртылған. 2024 йылда республиканың 33 муниципаль берәмегендә 143 йорт төҙөкләндерелә. Бөтә эштәр 15 октябргә тиклем тамамланырға тейеш. Фото: glavarb.ru