Башҡортостанда төп майлы культураның береһе - көнбағыш алына. Республиканың 25 районда 25 мең гектарҙан был культура йыйып алынған. Уртаса уңыш гектарынан 15,7 центнер тәшкил итә. Төбәктә көнбағыш 34 район хужалыҡтарында үҫтерелә. Бөгөнгә алынған мәғлүмәттәргә ҡарағанда, иң тос уңыш Йәрмәкәй районында һуғылған - 5,4 мең тонна. Быйыл республикала 478,5 мең гектар майҙанға майлы культуралар сәселгән, уларҙың 315 мең гектарын көнбағыш тәшкил итә, ҡалғаны - рапс, гәрсис, соя, етен. 2023 йылда көнбағыштың уңышы 431,1 мең тонна тәшкил иткән. Тағы ла ауыл хужалығы эшсәндәре шәкәр сөгөлдөрөн алыу менән мәшғүл. Сөгөлдөр сәскән 19 райондың хужалыҡтары 29,4 мең гектар майҙанда техник культура ҡаҙып алған, был бөтә күләмдең 51 проценты. Тамыраҙыҡтарҙың тулайым йыйымы 1 миллион 328 мең тонна тәшкил иткән. Уртаса уңыш гектарынан 452 центнерға еткән. Төбәктең шәкәр заводтары 196 мең тонна сөгөлдөр эшкәрткән, 24,6 мең тоннанан ашыу шәкәр етештергән. Башҡортостан быйыл соя уңышы менән маҡтана ала. Быйыл соя үҫтерелгән 25 район аграрийҙары майлы культуралар менән 6 мең гектарҙан ашыу майҙанды йыйып алған. Был бөтә майҙандарҙың өстән бер өлөшө тиерлек (19,4 мең гектар). Тулайым 11,5 мең тонна орлоҡ һуғылған. Уртаса уңыш гектарынан 19 центнерҙан аша. Иң тос уңыш әлегә Благовар һәм Ауырғазы райондарында йыйылған, 3 һәм 2,1 мең тонна. Иң яҡшы соя уңышы Кушнаренко районында, бында гектарынан 25-әр центнер уңыш сыҡҡан. Башҡортостан быйыл соя үҫтереү буйынса Рәсәйҙә иң яҡшы төбәктәрҙең береһе тип танылды. Ауырғазы районында үткән семинар сиктәрендәге эксперттар, технологияларҙы дөрөҫ һайлағанда һәм культураны дөрөҫ үҫтергәндә яҡшы уңыш алырға мөмкин, тип билдәләне. Фотолар Башҡортостандың Ауыл хужалығы министрлығынан алынды.