Халыҡ-ара ғилми-ғәмәли конференция ойошторолдо

Өфөләге "Торатау" конгресс-холында "Рәсәй барлыҡҡа килгән күп полярлы донъяла: киләсәкте аңлау" тигән халыҡ-ара ғилми-ғәмәли конференция ойошторолдо. Уның эше бер юлы өс урында уҙҙы. Конгресс-холдың ҙур залында үткәрелгәне "Евразия донъяға тәьҫир итеү субъекты: барлыҡҡҡа килеү принциптары һәм киләсәк" тип аталды. Ойоштороусылары – Башҡортостан Хөкүмәте, шулай уҡ уны уҙғарыуға Коллектив хәүефһеҙлек тураһында килешеү ойошмаһы секретариаты (ОДКБ), милли инновацион системалар союзы, Социаль-консерватик сәйәсәт үҙәге (ЦСКП) булышлыҡ иткән. Коллектив хәүефһеҙлек тураһында килешеү ойошмаһы аналитика хеҙмәте етәксеһе Юрий Шувалов белдереүенсә, халыҡ-ара ғилми-ғәмәли конференцияның тап Рәсәй Президенты Владимир Путиндың тыуған көнөндә үтеүе оло мәғәнәгә эйә. Владимир Владимирович дөрөҫ сәйәсәт алып бара, халыҡтың йәшәйешен яҡшыға үҙгәртеү өсөн бар көсөн һала, үҙенең позицияһы бар. Юрий Евгеньевич фекер алышыуҙа Башҡортостан Башлығы янындағы Башҡортостан дәүләт хеҙмәте һәм идара итеү академияһы ректоры Данияр Абдрахмановтың ҡатнашыуына ҡыуанысын йәшермәне. – Белеүебеҙсә, Өфө Евразия мәсьәләләрен өйрәнеүсе ҡала, – тине Юрий Шувалов. – Бөгөнгө сараға Ҡытай Халыҡ Республикаһынан ҡунаҡтарҙың килеүе һәр йәһәттән дә отошло. Был ил менән беҙ көслө хеҙмәттәшлек булдырғанбыҙ, мөнәсәбәттәр бик яҡшы ҡоролған. Киләсәктә ике ил араһында ҙур конференция уҙғарыу ҙа планда юҡ түгел. Ғөмүмән, көрсөк артта ҡалыр, ҡаршылыҡтарҙы йырып сығыуыбыҙҙа тамсы ла шик юҡ. Коллектив хәүефһеҙлек тураһында Килешеү ойошмаһы секретариатының кәңәшсеһе-матбуғат секретары, сәйәсәт фәндәре докторы Наталья Харитонова "Гибрид һуғыш шарттарында коллектив хәүефһеҙлек системаһы" тип аталған тема буйынса сығыш яһаны. – Әле бөтөнләй бүтән донъя, ыҙғышта иң беренсе граждандарҙың зыян күреүе ныҡ насар, – тине Наталья Ивановна. – Һүҙ ҙә юҡ, Рәсәй дөрөҫ йүнәлеш алған, тимәк, йылдам үҫеш юлында. Махсус хәрби операцияның башланыуы уның шулай булыуына асыҡ миҫал. Шулай уҡ кесе залда "Халыҡ-ара әһәмиәткә эйә тәбиғи һәм мәҙәни мираҫ объекттары Евразия территорияһында тотороҡло үҫештә" исемлеһендә һәм 2-се конференция залындағы "Реаль иҡтисад секторына инвестициялар финанс суверенитетына фактор: яңы мәғариф компетенциялары һәм киләсәк" тигәнендә сарала ҡатнашыусылар ҡыҙыу фекер алышты. Төштән һуң уҙған пленар ултырышта ла етди мәсьәләләр тураһында һөйләшеү булды. Ишембай нефть колледжы директоры Хәмит Баймырҙиндың һүҙҙәренә ҡарағанда, бигерәк тә хәҙер бындай сараларҙы йыш уҙғарыу кәрәк, уға йәштәрҙе лә йәлеп итеү бик тә яҡшы. Фото: Илдар АҠЪЮЛОВ.