Уҙған аҙнала Мәскәүҙә “Пушкин картаһы” премияһы еңеүселәрен бүләкләү тантанаһы үтте. Башҡортостан был премияның лауреаты тип танылды. Программаны тормошҡа ашырыу буйынса республика илдең алдынғы 10 төбәге исемлегенә инде. Бөгөн Хөкүмәттең аҙналыҡ кәңәшмәһенда Башҡортостан Башлығы Радий Хәбиров республиканың мәҙәниәт министры вазифаһын башҡарыусы Әминә Шафиҡованы был еңеү менән ҡотланы һәм эште туҡтатмаҫҡа ҡушты. “Пушкин картаһы”ның нисек эшләүен даими анализларға, яңы мөмкинлектәр килеп сыҡһа, уларҙы шунда уҡ файҙаланыуға индерергә тигән бурыс ҡуйылды. – Әминә Ивний ҡыҙы, ҙур рәхмәт, – тип Радий Хәбиров мәҙәниәт министры вазифаһын башҡарыусы йөҙөндә республиканың барлыҡ мәҙәниәт тармағы вәкилдәренә мөрәжәғәт итте. – Был – уҡыусыларыбыҙ, балаларыбыҙ өсөн шәп мөмкинлек. Хөсәйен Әхмәтов исемендәге Башҡорт дәүләт филармонияһы “Иң яҡшы төбәк концерт майҙансығы” номинацияһында еңде – афарин.