Башҡортостанда һуңғы йылдарҙа ит етештереү йүнәлеше әүҙем үҫешә.Башҡортостан Хөкүмәте Премьер-министр урынбаҫары – ауыл хужалығы министры вазифаһын башҡарыусы Илшат Фәзрахманов билдәләүенсә, төбәктә ит етештереү 211 мең тоннаға тиклем артҡан. — Быйылғы йылдың ете айында ғына республикала 77,5 миллиард һумлыҡ малсылыҡ продукттары етештерелә. Ә инде элек малсылыҡтың ҙур өлөшө шәхси ярҙамсы хужалыҡтарға төшһә, хәҙер нисбәт ауыл хужалығы предприятиелары һәм хужалыҡтар файҙаһына үҙгәрҙе, - ти Илшат Фәзрахманов. Эре малсылыҡ хужалыҡтары менән бергә райондарҙа крәҫтиән (фермер) хужалыҡтары ла берҙәй әүҙем эшләй һәм үҫеш юлында. Шундайҙарҙың береһе – Ҡыйғы районынан “Алағуҙ” ауыл хужалығы кооперативы. Марсель Таһиров һәм уның ғаиләһе һыйыр һәм аттар үҫтереү менән шөҡөлләнә. Уларҙың хужалығында 350 баш һыйыр малы һәм 250 баш йылҡы һанала. Марсель ауыл хужалығы тармағына атаһының эшен дауам итер өсөн килә. Мәктәпте тамамлап, буласаҡ һөнәрен һайлағанда, ауылға ҡайтып, малсылыҡ менән шөғөлләнергә уйлап та бирмәй ул. Юғары уҡыу йортонда белем алғандан һуң ун йыл самаһы газ үткәреү өлкәһендә эшләй. Газ һәм нефть торбаларын үткәреү проекттары менән шөғөлләнә, бөтә Рәсәй буйлап командировкаларға йөрөй. Әммә хеҙмәт баҫҡысынан күтәрелгән һайын, күңеленә ниҙер етмәгәнен аңлай ул. Ауылдың тартыу көсөнә ҡаршы тора алмай. Хәҙер иһә был ҡарары дөрөҫ булыуын аңлай ул. Заманса ҡараш, йәш кешенең ғәйрәте атаһының эшен тағы ла йәнләндереп ебәрә. Марсель малсылыҡ менән генә шөғөлләнеп ҡалмай, итте үҙҙәренең цехында эшкәртеү һәм иттән төрлө ризыҡтар етештереү кәрәклеген самалап эш башлай. Бөгөн улар етештергән продукция районда ғына түгел, сит тарафтарҙа ла һорау менән файҙалана. Үҙ эшен башлап ебәргәс, белемен камиллаштырыу маҡсаты менән “Россельхозбанк” ойошторған фермерҙар мәктәбендә “Агротуризм” һәм “Ресторан бизнесы өсөн ауыл хужалығы тауарҙарын етештереү” йүнәлеше буйынса уҡый. «Беҙҙең етештергән аҙыҡ-түлек тәбиғи һәм экологик яҡтан таҙа. Башҡаларҙан айырмалы эшебеҙҙең үҙенсәлеге шунда: йылҡы һәм һыйыр малы йыл әйләнәһенә көтөүлектә. Һыйырҙарҙы ла, аттарҙы ла ниндәй ҙә булһа махсус өҫтәмәләр менән туҡландырмайбыҙ, бының кәрәге лә юҡ – йыл әйләнәһенә тәбиғи үлән менән генә туҡланалар. Беҙҙең эргәлә ҙур ҡалалар ҙа, сәнәғәт тармаҡтары ла юҡ, - ти ул. Марсель "Бәләкәй һәм урта эшҡыуарыҡ, шәхси эшҡыуарлыҡ башланғыстарына ярҙам итеү" (нацпроект "Малое и среднее предпринимательство и поддержка индивидуальной предпринимательской инициативы") милли проекты сиктәрендә Башҡортостан ауыл хужалығы министрлығының "Агростарап" грантына конкурста ҡатнаша һәм тормошҡа ашырыу өсөн аҡса ала. Киләсәктә кооперативты ҙурайтырға уйлай. Фотолар Башҡортостандың ауыл хужалығы министрлығынан алынды.