Мәшһүр йырсы Фән Вәлиәхмәтовты тыуған төйәге – Башҡортостандың Шаран районында ололап һуңғы юлға оҙатыуҙары тураһында хәбәр иткәйнек. Уның менән оҙаҡ йылдар тығыҙ хеҙмәттәшлек иткән йырсы һәм композитор Зифа Нагаева билдәле шәхестәрҙең, Башҡортостанда йәшәгән татар зыялыларының легендар йырсыны һуңғы юлға оҙатырға ккилмәүенә көйөнөсөн белдергән. - Халыҡ, шаранлылар, бик күп килгән ине. Татарстандан килеүселәр ҙә булды. Мин улар араһынан сәхнә йондоҙҙарын, яҙыусыларҙы эҙләнем. Улар бик йылы һүҙҙәр әйтеп, легенданы (күптәр “Фән абый – беҙҙең легенда” тип, социаль селтәрҙәргә яҙҙы бит) сәскәләргә күмер, тип өмөтләнгән инем. Тик өмөттәрем аҡланманы. Шарандан әрнеп ҡайтып киләм. Дуҫымды ерләгән өсөн түгел, үҙебеҙ, дөрөҫөрәге милләтебеҙ өсөн рәнйеп... Ҡайҙа һеҙ, йондоҙҙар? Ҡайҙа һеҙ, сәхнә тотҡан артистар? Нишләп Фәнде оҙатырға килгән кешеләр араһында билдәле шәхестәр булманы? Әллә мин ҡартаям, дөрөҫ уйламайыммы, замандан арта ҡаламмы икән?! Миндә артистарға, зыялыларға һәм дуҫтарға ҡарата ихласлыҡ көслө. Ә яҙыусылар һуң ҡайҙа? Яҙыусылар берлеге бар. Ҡайҙа ғына, ниндәй генә саралар уҙһа ла, Фән Вәлиәхмәтовты саҡырып йырлаттылар. Был сараларҙың дәрәжәһе күтәрелде. Фән бик күп яҙыусыларҙың һүҙҙәренә яҙылған йырҙарҙы башҡарҙы. Бөгөнгө хушлашыу сараһында ике шағир – Вәлит Илембәтов менән Рәмил Сурағолов ҡына булды. Беҙ бит үҙебеҙҙең бөйөктәребеҙҙе хөрмәтләй белмәйбеҙ. Былай булмай, беҙ бит әле был яҡта, фани донъяла, йәшәргә өйрәнергә һуңға ҡалмайбыҙмы? Йән өҙгөләнә. Был турала ҡысҡырып һөйләргә ҡурҡмайым. Фән дуҫымдың рухы мине ғәфү итһен, сөнки ул – ҡәҙер-хөрмәткә лайыҡ шәхес, – тип яҙҙы Зифа Нагаева. Билдәле йырсы-композиторҙың был әрнеүле сығышы социаль селтәрҙәрҙә таралғас, уға теләктәшлек белдереүселәр ҙә, башҡасараҡ фекер әйтеүселәр булған. “Зифа апай, кешеләр буш түгел. Бөтәһенең банкеттары, концерттары бар. Беҙ барыһын да ташлап, Фән ағайҙы оҙатырға барырға тейешме? Бөтә артистарҙы бысраҡҡа һалып тапапрға ярамай”, – тигән бер йәш йырсы. Бындай фекерҙәргә Зифа Нагаева бөтөнләй аптырауын белдергән. “Бөйөк шәхестәргә ҡарата шундай фекерҙә булған йырсы сәхнәгә сығырға тейешме икән? Шаҡ ҡаттым”, – тигән ул... Сығанаҡ: https://shahrikazan.ru һәм https://shahrichalli.ru