2024 йылдың 9-11 октябрендә Башҡортостанда башҡорт теле буйынса онлайн олимпиада үтте. Акцияла барлығы 41 567 кеше ҡатнашты. Ҡатнашыусыларға ҡатмарлыҡ буйынса өс кимәлдең береһен һайлап, 45 минут эсендә 30 һорауға яуап бирергә тәҡдим ителде. Башланғыс кимәлде (башҡорт телен яңы өйрәнә башлағандар өсөн) 23 714 кеше, башҡорт телен иркен белеүселәр кимәлен (башҡорт телендә иркен аралашҡан ҡатнашыусылар өсөн) 16 335 кеше, башҡорт теленең диалекттарында олимпиаданы 1 518 кеше һайлаған. Тест тамамланғас, һәр ҡатнашыусыға йыйылған балдар һаны менән сертификат тапшырылды. Олимпиада тамамланғандан һуң basholimpiada.ru сайтында белемде үҙ аллы тикшереү өсөн һорауҙарға дөрөҫ яуаптар ҡуйылды. Олимпиаданы Башҡорт телен һаҡлау һәм үҫтереү ойошмаһы һәм «Мираҫ» йәштәрҙең башланғыстарына булышлыҡ итеү фонды үткәрҙе. Проект Башҡортостан Башлығы грантына тормошҡа ашырыла. - 2023 йылдың октябрендә олимпиада беренсе тапҡыр үтте. Унда Рәсәйҙең 67 төбәгенән һәм 23 төрлө илдән вәкилдәр ҡатнашты. Биш көн дауамында бөтәһе 27 614 кеше белемен тикшерҙе. Быйыл уларҙың һаны тағы ла артыуы ҡыуаныслы күренеш, - ти Башҡорт телен һаҡлау һәм үҫтереү фонды директоры Гөлназ Йосопова.