Трамвай юлдары менән булған хәлгә түҙерлек әмәл ҡалманы

Башҡортостан Башлығы Радий Хәбиров Өфөнөң трамвай инфраструктураһын яңыртыу проектын тәҡдим итте. Был хаҡта 14 октябрҙә төбәк етәксеһе үткәргән «Транспорт сәғәте» кәңәшмәһендә һүҙ барҙы. Күләмле проектты тормошҡа ашырыу ҡаланың көньяҡ өлөшөндә 8,1 саҡрымдан ашыу юлды яңыртыуҙан башлана. Ремонт эштәре 2025 йылда башланырға тейеш. Бынан тыш, республиканың баш ҡалаһына Мәскәүҙән 69 трамвай бушлай тапшырыласаҡ. Тәүге өс составты Өфөгә килтергәндәр ҙә инде. Ә 2024 йылдың ноябрь аҙағына тиклем паркты тағы 19 вагон тулыландырасаҡ. – Трамвай – уңайлы экологик йәмәғәт транспорты төрө, әммә ул Өфөлә оҙаҡ ваҡыт баһаланмай килде. Шуға күрә трамвайҙарҙың сифатына ла, юлдарҙың торошона ла һорауҙар бар, – тип билдәләне Радий Хәбиров. – Киләһе йылда уҡ ремонт башлар өсөн проектлауға тотонабыҙ. Мәсьәләне ҡала ҡаҙнаһы иҫәбенә хәл итә башлайбыҙ, республика ла ярҙам итәсәк. Был эште 2027 йылда тамамларға планлаштырабыҙ. Өфөлә трамвай юлдары менән булған хәлгә түҙерлек әмәл ҡалманы. Улар автомобилселәргә лә, йәйәүлеләргә лә проблемалар тыуҙыра. Шуға күрә трамвай юлдарын яңыртыу – беҙҙең өҫтөнлөклө проекттарҙың береһе. “Транспорт сәғәте”ндә ҡатнашыусылар шулай уҡ төбәк юлдарында ауырлыҡ-габарит контроле системаһын үҫтереүҙе тикшерҙе. Хәтерегеҙгә төшөрәбеҙ, быға тиклем республикала 20 автоматик пункт булдырылғайны. Шул уҡ ваҡытта йөк транспорты водителдәре урындағы әһәмиәттәге юлдарҙа йыш ҡына бындай постарҙы урап үтә. Ошоға бәйле алдағы “Транспорт сәғәте”нә төбәк етәксеһе Башҡортостан Транспорт министрлығына ауырлыҡ-габарит контроленең яңы пункттарын урынлаштырыу буйынса тәҡдимдәр индерергә ҡушты. Яңы ҡорамалдар һатып алғанда тәү сиратта үҙебеҙҙең етештереүселәргә иғтибар итергә ҡушылды. Көн тәртибендәге тағы бер мәсьәлә – төбәк, муниципаль-ара һәм урындағы әһәмиәттәге автомобиль юлдарын ремонтлау барышы. Мәҫәлән, 2024 йылға план 17 муниципалитет биләмәһендә дөйөм оҙонлоғо 142,5 км булған 56 участканы яңыртыуҙы күҙ уңында тота. Шул уҡ ваҡытта төҙөүселәр 28 объектта эштәрҙе тамамлаған да инде. Яңыртылған юлдар исемлегенә коммерцияға ҡарамаған баҡса ширҡәттәренә инеү юлдары ла инә. Йыл аҙағына тиклем 72 ширҡәттә дөйөм оҙонлоғо 26,5 км булған 20 ошондай юлды тәртипкә килтереү планлаштырыла.