Ҙур йорт һалып, Сурай ауылында төпләнгән, 2003 йылдан фермерлыҡ менән шөғөлләнгән уңған ғаиләләрҙең береһе ул Әлфинә менән Ирек Иркәбаевтар. Улар - ысын мәғәнәһендә ауылдаштарының таянысы. Ауылда мәшәҡәттәр етерлек. Әленән-әле ҙур техникаға ла мохтажлыҡ сығып тора. Шул ваҡытта Ирек Рәшит улы уларға ярҙамға килә. Бәләкәйҙән ауыл эшен күреп үҫә, колхозда хеҙмәт тәжрибәһе туплай ул. Колхоздар тарҡалғас, бер аҙ Себер тарафтарында ла эшләп ҡайта. Ситтә йөрөп, ауылдан да яҡшыһы юҡ икән, тигән фекергә килдем, ти. –Атайым ғүмер буйы колхозда ветеринар табип, зоотехник, ферма мөдире булып эшләне. Бала саҡтан уның менән ат кырандасына ултырып фермалар буйлап сығып китә торғайныҡ. Ауыл хужалығында эш рәтен бәләкәйҙән күреп үҫкәнгә, малсылыҡҡа тотонғанмындыр ҙа. Атайымдың шул ваҡытта әйткән кәңәштәрен әле лә ҡулланам, – ти Ирек Иркәбаев. Фермерҙың бөгөнгө көндә 167 гектарҙа һөрөнтө ере, 80 гектар бесәнлеге бар. Баҫыуҙарҙа иген, арпа, һоло үҫтерә, уның уңышы мал ашатыуға китә. 30 баш һауын һыйырҙары, 15-ләп һимертеүгә ҡуйылған малдары бар. Һөт, ит етештереп файҙа күрәләр. Йүнсел хужа техникаһын да хәстәрләгән. Т-4 “Алтай” тигән сылбырлы тракторы, СК-5 “Нива” иген йыйыу комбайны, "КамАЗ" автомашинаһы бар, лизингка МТЗ-82 тракторын алған. –Ауыл хужалығында эшләүселәргә хөкүмәт тарафынан да иғтибар күрһәтелә. Һөтсөлөк, малсылыҡты үҫтереүгә ярҙам итеү буйынса дәүләт программалары эшләй. Техника алғанда да ярҙамдан файҙаландым, – ти Сурай йүнселе. Эштең уңышлы барыуы үҙеңдең егәрлелегеңә лә бәйле. Был йәһәттән Иркәбаевтар эштән ҡурҡмай. Ҡыҙыу ураҡ мәлдәрендә ирле-ҡатынлы икәүләшеп техникаға ултыралар. Ғаилә башлығы комбайнда иген урһа, Әлфинә ханым "КамАЗ" машинаһында уңышты ташып тора. Хеҙмәткә һөйөүҙе улар балаларында ла тәрбиәләй алған. Шуныһы ҡыҙыҡлы, Иркәбаевтар нәҫелендә медицина хеҙмәткәрҙәре, ветеринар табиптар күпселекте тәшкил итә. Ирек Рәшит улының әсәһе ғүмер буйы ауылда фельдшер булып эшләгән, атаһы ветеринар һөнәрен үҙ иткән. Шуға был ғаиләлә үҫкән балаларҙың да атай-әсәйҙәре юлынан китеүе ғәжәп түгел. Ауылда фермерлыҡ менән шөғөлләнеүселәр булыуы халыҡҡа эш урындары йәһәтенән дә отошло. Хужалыҡ киңәйгән, көсәйгән һайын ауыл өсөн ҙурыраҡ таяныс улар. Бары тик хеҙмәт, тырышлыҡ аша уңышҡа өлгәшеп булыу өлгөһөн күрәбеҙ Иркәбаевтар миҫалында. Автор фотоһы.