“Мәғариф” милли проектына ярашлы, Нефтекама ҡалаһының 1-се лицейында “Кванториум” балалар технопаркы асылды. Был – республикала төҙөлгән алтынсы ошондай учреждение, тип хәбәр иттеләр БР Мәғариф һәм фән министрлығынан. – Хәҙер уҡыусылар һанлы лабораторияларҙы файҙаланып, аддитив һәм лазер технологияларын, биология, химия, физика, физиологияны өйрәнә, робот техникаһы, геоинформатика, пилотһыҙ авиация системалары менән шөғөлләнә ала, - тип билдәләне министрлыҡ белгестәре. Технопарктар селтәрен булдырыу Башҡортостанда балаларҙы өҫтәмә белем биреү менән тәьмин итеү күрһәткесен 80 процентҡа тиклем арттырыуға булышлыҡ итәсәк. Йыл һайын “Кванториум”дарҙа тәбиғи-фәнни һәм техник программалар буйынса дәрестәргә – 800-ҙән ашыу баланы, ә балалар технопарктарының асыҡ сараларына дүрт меңдән ашыу уҡыусыны йәлеп итеү күҙаллана. “Мәғариф” милли проекты (национальный проект “Образование”) Рәсәйҙең бөтә балаларының һәм үҫмерҙәренең потенциалын максималь асыу өсөн тигеҙ мөмкинлектәр булдырыуға йүнәлтелгән. Бөтә илдә мәктәптәр, колледждар, техникумдар төҙөйҙәр, булғандарын яңырталар, шулай уҡ уларҙы заманса ҡорамалдар менән йыһазландыралар. Бушлай өҫтәмә белем биреү системаһы “Кванториум” технопарктар селтәрен киңәйтеү иҫәбенә үҫешә. Милли проекттар Рәсәй Президенты Владимир Путиндың ҡарары буйынса 2019 йылдан тормошҡа ашырыла. Фото: БР Мәғариф һәм фән министрлығы.