Ադրբեջանի նախագահ Իլհամ Ալիևը հայտարարել է, որ «արբեջանցիների վերադարձը «Արևմտյան Ադրբեջան» ժամանակի հարց է, և որ Զանգեզուրի իրենց հայրենակիցները ոգևորությամբ և անհամբերությամբ սպասում են վերադարձի օրվան ու «Մեծ վերադարձ» ծրագրի իրականացմանը, Ալիևի խոսքերը փոխանցում են ադրբեջանական լրատվամիջոցները։
«Ղարաբաղցիները, որոնք երբեք չեն ապրել այդ հողերում, բայց ապրել են այդ հողերը վերադառնալու հույսով, այսօր վերադառնում են Ղարաբաղ։ Համոզված եմ, որ նույն տեսարանը կտեսնենք Արևմտյան Ադրբեջան վերադառնալիս»,- հայտարարել է նա։
Ալիևը կրկին խոսել է սպառնալիքների լեզվով և հայտարարել, որ Բաքուն մեկ անգամ արդեն հարցը լուծել է ռազմական ճանապարհով և «մեծ հավանականություն կա, որ «արևմտյան Ադրբեջան» վերադարձի հարցը նույնկերպ առաջ մղվի»։
«Մեր նկատմամբ պատժամիջոցներ կիրառվեցին, միջազգային տարբեր հարթակներում բացահայտ հարձակվեցին մեզ վրա, և սկսվեց սառը պատերազմը։ Սա շարունակվում է նաև այսօր։ Սա կարո՞ղ է ազդել մեր կամքի վրա: Երբե՛ք»,- հայտարարել է Ադրբեջանի նախագահը։
Սեպտեմբերի 10-ին վարչապետ Նիկոլ Փաշինյանը, ելույթ ունենալով «Երևանյան երկխոսության» ֆորումում, երրորդ անգամ դիմել էր Բաքվին՝ առաջարկելով արդեն համաձայնեցված կետերով ստորագրել խաղաղության համաձայնագիր, ստանալ «հիմնարար փաստաթուղթ», ապա շարունակել մնացած հարցերի քննարկումը։ Նույն օրը Բաքուն «անընդունելի» էր անվանել Երևանի այս առաջարկը։
Օգոստոսի 31-ին հրավիրած ասուլիսում Փաշինյանը հայտարարել էր, որ ՀՀ-ն Ադրբեջանին առաջարկել է համաձայնեցված կետերով ստորագրել խաղաղության պայմանագիր։
Սեպտեմբերի 11-ին Փաշինյանն ԱԺ-ում հայտարարել էր, որ Երևանին ու Բաքվին հաջողվել է համաձայնեցնել երկու պետությունների հարաբերության հիմնարար սկզբունքների անկյունաքարային բովանդակություն ունեցող դրույթները։ Սեպտեմբերի 23-ին Ադրբեջանի նախագահ Իլհամ Ալիևը նշել էր, որ «Երևանը պայմանագրի բոլոր չհամաձայնեցված դրույթներն իր տարբերակով հանել է խաղաղության պայմանագրից»։
Նորություններին հետևեք մեր կայքում, ինչպես նաև Telegram-ում և YouTube-ում